ന്യൂഡല്‍ഹി: ജമ്മു കശ്മിരില്‍ നടക്കാന്‍ പോകുന്നത് ജമ്മു കശ്മിരിന്റെ ചരിത്രത്തിലെ ഏറ്റവും ചെറിയ തെരഞ്ഞെടുപ്പ്. ആദ്യമായാണ് മൂന്ന് ഘട്ടങ്ങളായി തെരഞ്ഞെടുപ്പ് നടക്കുന്നത്. കഴിഞ്ഞ കാലങ്ങളില്‍ നാലോ അതില്‍ കൂടുതല്‍ ഘട്ടങ്ങളായോ ആണ് കശ്മിരില്‍ തെരഞ്ഞെടുപ്പ് നടന്നുവന്നത്. കേന്ദ്രഭരണപ്രദേശത്തിന്റെ സങ്കീര്‍ണമായ ഭൂഘടന, ഒന്നിച്ച് സുരക്ഷയൊരുക്കാനുള്ള പ്രയാസങ്ങള്‍ തുടങ്ങിയവ കണക്കിലെടുത്തായിരുന്നു ഇത്.

ഒരോഘട്ടങ്ങളിലേക്കും തെരഞ്ഞെടുപ്പ് പൂര്‍ത്തിയായാല്‍ അവിടെ വിന്യസിച്ച സുരക്ഷാ സൈനികരെ അടുത്ത ഘട്ടം തെരഞ്ഞെടുപ്പ് നടക്കുന്ന മണ്ഡലങ്ങളിലേക്ക് മാറ്റുകയാണ് പതിവ്. 2002ലെ തെരഞ്ഞെടുപ്പ് നടന്നത് നാലുഘട്ടമായാണ്. 2014ലെ തെരഞ്ഞെടുപ്പ് അഞ്ചു ഘട്ടമായായിരുന്നു. ഇത്തവണ കൂടുതല്‍ സ്ഥാനാര്‍ഥികളുണ്ടാകാനുള്ള സാധ്യതയുണ്ടായിട്ടും മൂന്ന് ഘട്ടങ്ങളിലായി തെരഞ്ഞെടുപ്പ് നടത്താനുള്ള നീരുമാനം രാഷ്ട്രീയ നിരീക്ഷകരെ അത്ഭുതപ്പെടുത്തിയിട്ടുണ്ട്.

ലോക്സഭാ തെരഞ്ഞെടുപ്പ് വിജയകരമായി നടത്തിയ അനുഭവപരിചയത്തിലാണ് മൂന്ന് ഘട്ടങ്ങളായി നടത്താന്‍ തീരുമാനിച്ചതെന്നാണ് മുഖ്യ തെരഞ്ഞെടുപ്പ് കമ്മിഷണര്‍ രാജീവ് കുമാറിന്റെ വിശദീകരണം. കശ്മിരില്‍ കമ്മിഷന്‍ നടത്തിയ സന്ദര്‍ശനത്തില്‍ ജനാധിപത്യ പ്രക്രിയയില്‍ പങ്കെടുക്കാനുള്ള രാഷ്ട്രീയപ്പാര്‍ട്ടികളുടെ അത്യാവേശം വ്യക്തമായിരുന്നു. തെരഞ്ഞെടുപ്പ് പ്രക്രിയ വേഗത്തില്‍ പൂര്‍ത്തിയാക്കുകയെന്ന ലക്ഷ്യത്തോടെയാണ് മൂന്ന് ഘട്ടങ്ങളിലായി തെരഞ്ഞെടുപ്പ് നിശ്ചയിച്ചത്. ലോക്സഭാ തെരഞ്ഞെടുപ്പ് പലഘട്ടങ്ങളിലായി നടത്തിയത്  വിമര്‍ശിക്കപ്പെട്ടിരുന്നുവെന്നും മുഖ്യ തെരഞ്ഞെടുപ്പ് കമ്മിഷണര്‍ ചൂണ്ടിക്കാട്ടി.

Jammu and Kashmir are set to witness their shortest-ever election, spanning just three phases, a significant departure from previous multi-phase elections. This decision, influenced by security and logistical considerations, has surprised political observers.