ഇന്ത്യക്കാര്‍ക്ക് മാത്രമല്ല മലയാളികള്‍ക്കും പ്രിയമാണ് ചായകുടി. ഒരു ദിവസം ചായകുടിച്ചില്ലെങ്കില്‍ തലവേദനയോ ഉന്‍മേഷക്കുറവോ തോന്നുന്നതായി നാം പറയാറുമുണ്ട്. ചിലരുടെ വികാരം തന്നെയാണ് ചായ. എത്ര ചായ വേണമെങ്കിലും കുടിക്കുന്ന ആളുകളുമുണ്ട്. ഇങ്ങനെ ചായ പ്രേമികളായവര്‍ക്ക് വേണ്ടി ഒരു അടിപൊളി ചായ റെസിപ്പി ഇതാ.

സാധാരണ നമ്മള്‍ കട്ടന്‍ ചായയും പാല്‍ച്ചായയുമാണ് ഉണ്ടാക്കാറുള്ളത്. എന്നാല്‍ കാലം മാറിയപ്പോള്‍ പല ഫ്‌ളേവറുകളുള്ള കട്ടന്‍ചായകളും പാല്‍ച്ചായകളും ഇന്ന് ലഭ്യമാണ്. പ്രത്യേകിച്ച് കല്യാണ വിരുന്നുകളില്‍ പത്തും ഇരുപതും ഫ്‌ളേവറുകളില്‍ ഉള്ള ചായക്കായി പ്രത്യേകം കൗണ്ടര്‍ തന്നെ ഉണ്ടിപ്പോള്‍. വടക്കേ ഇന്ത്യയാണ് ചായ രുചികളില്‍ കേമന്‍. ഏലയ്ക്കാ ചായയും മസാല ചായയും ഇഞ്ചിച്ചായയുമെല്ലാം അവിടെ കാലങ്ങളായി ഉണ്ട്. ഇപ്പോള്‍ നമ്മളും ചായയില്‍ ഏലയ്ക്കയും ഇഞ്ചിയുമൊക്കെ ഇട്ടുതുടങ്ങിയിട്ടുണ്ട്.

ആവശ്യമുള്ള ചേരുവ

പാല്‍, ചായപ്പൊടി, ഇഞ്ചി, ഏലയ്ക്ക, കറുവപ്പട്ട, കുരുമുളക്, പഞ്ചസാര/ശര്‍ക്കര, വെള്ളം

 തയ്യാറാക്കുന്ന വിധം 

അടുപ്പത്ത് ചായയ്ക്ക് ഒരു ഗ്ലാസ്സ് വെള്ളം വയ്ക്കുക. ചൂടാകുമ്പോള്‍ അതിലേക്ക് രണ്ട് ഏലയ്ക്കയും ഒരു ചെറിയ കഷ്ണം കറുവപ്പട്ടയും ചെറിയ കഷ്ണം ഇഞ്ചിയും രണ്ട്മൂന്ന് കുരുമുളകും ചതച്ച് ഇടുക. വെള്ളം തിളയ്ക്കുമ്പോള്‍ കടുപ്പം അനുസരിച്ച് ചായപ്പൊടിയുമിടുക. പൊടി വേവുമ്പോള്‍ ഒരു ഗ്ലാസ് ചൂടുള്ള പാല്‍ ഒഴിച്ച് തിളപ്പിച്ചെടുക്കുക. തിളച്ച് പൊങ്ങിവരുമ്പോള്‍ ഗ്ലാസിലേക്ക് അരിച്ചൊഴിക്കണം. ഇനി ചൂടോടെ ചായ കുടിച്ചു നോക്കൂ.  കിടിലന്‍ രുചിയായിരിക്കും.