മനുഷ്യന്‍ നടക്കും. അതെല്ലാവര്‍ക്കും അറിയാവുന്നതാണ്. എന്നാല്‍ മരങ്ങളോ..! നടക്കുമെന്ന് പറഞ്ഞാല്‍ നമ്മള്‍ വിശ്വസിക്കുമോ?  എങ്കില്‍ വിശ്വസിക്കണം. ഇത് ശരിയാണ്. നടക്കുന്ന മരം ഉണ്ട് അങ്ങ് സൗത്ത് അമേരിക്കയില്‍. സസ്യ ശാസ്ത്രജ്ഞന്മാര്‍ കണ്ടെത്തിയ ഈ അത്ഭുതമരമാണ് ഇപ്പോള്‍ ചര്‍ച്ചകളില്‍ നിറഞ്ഞു നില്‍ക്കുന്നത്.

സൊക്രോട്ടിയ എക്‌സോറേഷ്യ എന്നറിയപ്പെടുന്ന ഈ മരത്തിന് കാട്ടിനുള്ളിലൂടെ സഞ്ചരിക്കാനുള്ള സിദ്ധിയുണ്ടെന്നാണ് ഗവേഷകര്‍ കണ്ടെത്തിയിരിക്കുന്നത്. വാക്കിങ് പാം എന്നാണ് ഇതറിയപ്പെടുന്നത്. ഇക്വഡോറിലെയും മധ്യ അമേരിക്കയിലെയും മഴക്കാടുകളിലാണ് ഈ അത്ഭുത മരം ഉള്ളത്. മരത്തിന്റെ തടിയില്‍ നിന്നുതന്നെയാണ് ഈ മരത്തിന് വേരുകള്‍ മുളയ്ക്കുന്നത്.

പതുക്കെ പതുക്കെ വേരുകള്‍ മാറ്റിമാറ്റി പ്പിടിച്ചാണ് ഈ മരം മണ്ണിലൂടെ സഞ്ചരിക്കുന്നത്. എന്നാല്‍ വളരെ പെട്ടെന്നാണ് ഈ മാറ്റം നടക്കുന്നതെന്ന് കരുതേണ്ട. കാലങ്ങള്‍ എടുത്താണ് ഇത്തരം മാറ്റങ്ങള്‍ ഈ മരത്തിന് സംഭവിക്കുന്നത്. പീറ്റര്‍ എന്ന പാലിയോബയോളജിസ്റ്റാണ് ലോകത്തിന് മുന്നില്‍ ഈ നടക്കുന്ന മരത്തിനെ പരിചയപ്പെടുത്തിയത്. മരം ഇന്ന് വംശനാശ ഭീഷണിയിലാണ്.

കാടുതെളിക്കലും വനം കയ്യേറ്റവും ഈ മരങ്ങളുടെ നാശത്തിന് കാരണമായിക്കൊണ്ടിരിക്കുകയാണ്. നടക്കും മരങ്ങളുടെ വ്യത്യസ്തമായ വേരുകള്‍ മണ്ണൊലിപ്പിനെ തടയുന്നതാണ്. മാത്രമല്ല ഇവ ധാരാളം ജീവിവര്‍ഗ്ഗങ്ങള്‍ക്ക് താമസിക്കാനുള്ള സ്ഥലമായി നിലനില്‍ക്കുകയും ചെയ്യുന്നു. പ്രകൃതിക്ക് ഇത്രയും ഉപകാരങ്ങള്‍ ചെയ്യുന്ന ഈ മരത്തെ എന്തു വില നല്‍കിയാണെങ്കിലും സംരക്ഷിക്കുക തന്നെ ചെയ്യുമെന്നാണ് ഗവേഷകര്‍ പറയുന്നത്.