മലപ്പുറം: ജില്ലയില്‍   ഓണം - ബക്രീദ് ഫെയറിന് നാളെമുതല്‍ തുടക്കമാവും. ജില്ലാതല ഉദ്ഘാടനം  കുന്നുമ്മല്‍ മാളിയേക്കല്‍ ബില്‍ഡിങില്‍  മൂന്നിനു വൈകുന്നേരം മൂന്നിനു കൃഷി മന്ത്രി വി.എസ്. സുനില്‍കുമാര്‍ നിര്‍വഹിക്കും.
ജില്ലയില്‍ ഏഴു താലൂക്ക്  ഫെയറുകള്‍ സെപ്തംബര്‍ അഞ്ചു മുതല്‍ 13 വരെയും കൂടാതെ ഓരോ അസംബ്ലി നിയോജക  മണ്ഡലത്തിലും ഒരു ഓണ ചന്ത ഉറപ്പു വരുത്തുന്നതിന്റെ ഭാഗമായി എട്ട് ഓണം മാര്‍ക്കറ്റുകളും  പ്രവര്‍ത്തിക്കും. മാവേലി സ്റ്റോര്‍ ഇല്ലാത്ത അഞ്ചു പഞ്ചായത്തുകളില്‍ സ്‌പെഷല്‍ ഓണം മിനി  ഫെയറുകള്‍ സെപ്തംബര്‍ ഒമ്പതു മുതല്‍ 13വരെയും പ്രവര്‍ത്തിക്കും.  എല്ലാ സപ്ലൈകോ  വില്‍പ്പന ശാലകളും സെപ്തംബര്‍ ഒമ്പതു മുതല്‍ 13 വരെ ഇടവേളകളില്ലാതെ ഓണം മിനി  ഫെയറുകളായി പ്രവര്‍ത്തിക്കും.
  വില്‍പ്പന ശാലകളില്‍ പൊതുവിപണിയേക്കാള്‍  വിലക്കുറവില്‍ സാധനങ്ങള്‍ ലഭിക്കും. പലവ്യഞ്ജനങ്ങളും പച്ചക്കറികളും  ഫെയറുകളില്‍  ലഭിക്കും. സാധനങ്ങള്‍ വാങ്ങുന്ന ഉപഭോക്താക്കള്‍ക്കു പ്രത്യേക സമ്മാന  പദ്ധതികളും സപ്ലൈകോ ഒരുക്കിയിട്ടുണ്ട്. 300 രൂപയുടെ ശബരി ഉല്‍പ്പന്നങ്ങളുള്‍പ്പെടെ  2000 രൂപയ്ക്കു സാധനങ്ങള്‍ വാങ്ങുന്ന ഉപഭോക്താക്കള്‍ക്ക് ഒരു ഗിഫ്റ്റ് കൂപ്പണ്‍ നല്‍കും. 2000  രൂപയ്ക്കു മുകളിലുള്ള ഓരോ 1000 രൂപയ്ക്കും ഒരു ഗിഫ്റ്റ് കൂപ്പണ്‍ നല്‍കും.  നറുക്കെടുത്തു വിജയിക്ക് അഞ്ച് പവന്‍ സ്വര്‍ണ നാണയവും ഓരോ ജില്ലയിലെ വിജയിക്ക് ഒരു  പവന്‍ സ്വര്‍ണ നാണയവും നല്‍കും.  കൂടാതെ ബി.പി.എല്‍, എ.എ.വൈ കാര്‍ഡ് ഉടമകള്‍ക്ക്  സൗജന്യ കിറ്റ് വിതരണവും സപ്ലൈകോ വില്പന ശാലകളില്‍ ഉണ്ടായിരിക്കും.