ന്യൂഡൽഹി: മോദി സർക്കാർ നടപ്പാക്കാനിരിക്കുന്ന വഖഫ്‌ ഭേദഗതി ബില്ലിനെ എൻ.ഡി.എ ഘടകകക്ഷികളായ ടി.ഡി.പിയും (തെലുഗുദേശം പാർട്ടി) ജെ.ഡി.യുവും (ജനതാദൾ-യു) എതിർക്കും. മുസ്‍ലിം വ്യക്തി നിയമ ബോർഡ് ആണ് ഇക്കാര്യം അറിയിച്ചത്. ബില്ലിനെ എതിർക്കുമെന്ന് ടി.ഡി.പി നേതാവ് ചന്ദ്രബാബു നായിഡുവും ജെ.ഡി.യു നേതാവ് നിതീഷ് കുമാറും ഉറപ്പ് നൽകിയതിന് പിന്നാലെയാണ് മുസ്‌ലിം വ്യക്തി നിയമ ബോർഡിന്റെ വെളിപ്പെടുത്തൽ. 

ലോക്സഭയിൽ ബി.ജെ.പിയ്ക്ക് ഒറ്റയ്ക്ക് ഭൂരിപക്ഷമില്ലാത്തതിനാൽ ബില്ല് പാസാക്കിയെടുക്കൽ ഇനി ബി.ജെ.പിയ്ക്ക് ഒരു കടമ്പയാകും. ബില്ല് പാസാക്കാൻ ഇരു പാർട്ടികളുടെയും പിന്തുണ ആവശ്യമാണ്. എന്നാൽ ഘടക കക്ഷികളുടെ ഇപ്പോഴത്തെ നിലപാട് മോദി സംഘത്തിന് തിരിച്ചടിയാകും. ശക്തമായ എതിർപ്പുമായി പ്രതിപക്ഷ പാർട്ടികൾ നേരത്തെ മുതൽ രംഗത്തുണ്ട്. 

വഖഫ് ഭേദഗതി വിഷയത്തിൽ പ്രതിപക്ഷ പാർട്ടികളുടെ പ്രതിഷേധത്തെ തുടർന്ന് സംയുക്ത പാർലമെന്ററി സമിതി (ജെ.പി.സി) രൂപീകരിച്ചിരുന്നു. ഈ സമിതിയുടെ ആദ്യ യോഗം ഇന്നലെ നടന്നിരുന്നു. യോഗത്തിൽ ടി.ഡി.പിയും ജെ.ഡിയും വിഷയത്തിൽ പ്രതിപക്ഷ പാർട്ടികൾ ഉന്നയിക്കുന്ന കാര്യങ്ങൾ മുഖവിലക്കെടുക്കണമെന്ന് ആവശ്യപ്പെട്ടിരുന്നു. ഇതിന് പിന്നാലെയാണ് മുസ്‍ലിം വ്യക്തി നിയമ ബോർഡിന്റെ വെളിപ്പെടുത്തൽ.

ചന്ദ്രബാബു നായിഡുവുമായും നിതീഷ് കുമാറുമായും മുസ്‍ലിം വ്യക്തി നിയമ ബോർഡും വിവിധ മുസ്‍ലിം സംഘടനകളും കഴിഞ്ഞ ദിവസം ചർച്ച നടത്തിയിരുന്നു. ആ ചർച്ചകൾക്കൊടുവിലാണ് ബില്ലിനെ അനുകൂലിക്കില്ലെന്ന് രണ്ട് പാർട്ടികളും അറിയിച്ചതെന്ന് മുസ്‍ലിം വ്യക്തി നിയമ ബോർഡ് അധ്യക്ഷൻ ഖാലിദ് സെയ്ഫുള്ള റഹ്മാനി പറഞ്ഞു.

ഇവർക്ക് പുറമെ ആർ.ജെ.ഡി, ശിവസേന, ഡി.എം.കെ പാർട്ടികളുമായും കൂടിക്കാഴ്ച നടത്തിയതായും അവർ ബില്ലിനെ അനുകൂലിക്കില്ലെന്നും എതിർക്കുമെന്ന് ഉറപ്പ് നൽകിയതായും സംഘടന അറിയിച്ചു. ഭരണപക്ഷത്തേയും പ്രതിപക്ഷത്തെയും വിവിധ രാഷ്ട്രിയ പാർട്ടികളുമായി വ്യക്തി നിയമ ബോർഡും വിവിധ സംഘടനകളും ചർച്ചനടത്തുന്നുണ്ട്. 

• The Telugu Desam Party (TDP) and Janata Dal (JDU) will oppose the Waqf Amendment Bill, according to the Muslim Personal Law Board. This comes after TDP leader Chandrababu Naidu and JDU leader Nitish Kumar assured the board of their opposition to the bill.