ദുബൈ: ആർ.ടി.എയുടെ ഏറ്റവും പുതിയ ലേലത്തിൽ 300 പുതിയ നമ്പർ പ്ലേറ്റുകൾ ലഭിച്ചതായി ദുബൈ ടാക്സി കമ്പനി (ഡി.ടി.സി) അറിയിച്ചു. ഇത് ദുബൈയിലെ ഏറ്റവും വലിയ ടാക്സി ഓപറേറ്റർ എന്ന സ്ഥാനം ഉറപ്പിച്ചുവെന്നും അധികൃതർ അവകാശപ്പെട്ടു. ഈ അവാർഡ് ഡി.ടി.സിയുടെ ടാക്സി ഫ്‌ളീറ്റിൽ 6,000 വാഹനങ്ങളായി വർധിപ്പിക്കുകയും ടാക്സി വിപണി വിഹിതം 46 ശതമാനമായി ഉയർത്തുകയും എമിറേറ്റിലെ സുസ്ഥിരവും കാര്യക്ഷമവുമായ ഗതാഗതത്തിനായുള്ള വർധിച്ചു വരുന്ന ഡിമാൻഡിനെ സേവിക്കാനുള്ള പ്രതിബദ്ധത പ്രകടിപ്പിക്കുകയും ചെയ്യുന്നു. 

കമ്പനിയുടെ ഫ്ലീറ്റ് വിപുലീകരണവും മെച്ചപ്പെടുത്തൽ തന്ത്രവും പ്രകടമാക്കി വിപുലീകരിച്ച ഫ്ളീറ്റ് വാർഷിക വരുമാനത്തിൽ 100 ദശലക്ഷം ദിർഹം അധികമായി സൃഷ്ടിക്കുമെന്ന് പ്രതീക്ഷിക്കുന്നതായി സി.ഇ.ഒ മൻസൂർ റഹ്മ അൽ ഫലാസി അഭിപ്രായപ്പെട്ടു. "300 പുതിയ പ്ലേറ്റുകളുടെ അവാർഡ് ഡി.ടി.സിയുടെ ഫ്ലീറ്റ് വിപുലീകരണ തന്ത്രത്തിൻ്റെ സുപ്രധാന ഭാഗമാണ്.

2024ൽ ഞങ്ങളുടെ ഫ്ലീറ്റ് ഏകദേശം 10 ശതമാനം വർധിച്ചു. ഇപ്പോൾ ഞങ്ങളുടെ എല്ലാ വിഭാഗങ്ങളിലുമായി ഏകദേശം 9,000 വാഹനങ്ങളുണ്ട്. ടാക്സികൾ, ലിമോസിനുകൾ, ബസുകൾ, മോട്ടോർ സൈക്കിളുകൾ എന്നിവ ഇതിൽ ഉൾപ്പെടുന്നു. വളർച്ച, നവീകരണം, ഉപഭോക്തൃ കേന്ദ്രീകൃത സൊല്യൂഷനുകൾ എന്നിവയിലെ നിക്ഷേപം ദുബൈയിലെ മുൻനിര ഗതാഗത ഓപറേറ്റർ എന്ന നിലയിലുള്ള ഞങ്ങളുടെ സ്ഥാനത്തെ അടിവരയിടുന്നു" -അദ്ദേഹം വ്യക്തമാക്കി. 
300 പുതിയ പ്ലേറ്റുകളിൽ 25 ശതമാനം ഇലക്ട്രിക് ടാക്സികൾക്കായി അനുവദിക്കും.

ഇത് സുസ്ഥിരതയ്ക്കുള്ള കമ്പനിയുടെ പ്രതിബദ്ധത അടിവരയിടുന്നതാണ്. ഏറ്റവും പുതിയ ലോ കാർബൺ മൊബിലിറ്റി സൊല്യൂഷനുകളിലേക്ക് മാറുന്നതിനും 2050ഓടെ ദുബൈയുടെ നെറ്റ് സീറോ എമിഷൻ ലക്ഷ്യത്തെ പിന്തുണയ്ക്കുന്നതിനുമുള്ള കമ്പനിയുടെ തന്ത്രത്തിൻ്റെ ഭാഗമാണ് ഈ നീക്കാമെന്നും അദ്ദേഹം വിശദീകരിച്ചു.