എരുമപ്പെട്ടി: കുട്ടഞ്ചേരി പാടശേഖരത്തില്‍ യുവാക്കളുടെ കൂട്ടായ്മയില്‍ നെല്‍കൃഷിയൊരുങ്ങുന്നു. നൂറ് ഏക്കര്‍ വരുന്ന വയലിലാണ് യുവാക്കളുടെ നേതൃത്വത്തില്‍ നെല്‍കൃഷി ഇറക്കുന്നത്. നടീല്‍ യന്ത്രം തകരാറിലായതിനെ തുടര്‍ന്ന് പ്രദേശത്തെ കര്‍ഷകര്‍ക്ക് കൃഷിചെയ്യാന്‍ കഴിയാത്ത സാഹചര്യമായിരുന്നു.
യന്ത്രത്തിന്റെ തകരാര്‍ പരിഹരിക്കാനും പ്രവര്‍ത്തിപ്പിക്കാനും പരിശീലനം ലഭിച്ച തൊഴിലാളികള്‍ ഇല്ലാത്തതാണ് കര്‍ഷകരെ പ്രതിസന്ധിയിലാക്കിയത്.
ഇതിനെ തുടര്‍ന്ന് നാട്ടിലെ യുവാക്കള്‍ യന്ത്രതകരാര്‍ പരിഹരിച്ച് സ്വയം നടീല്‍ പരിശീലിച്ച് കൃഷിയിലേക്ക് ഇറങ്ങുകയായിരുന്നു. പഞ്ചായത്ത് അംഗം സി.വി ബിനോജ് ഞാറ് നടീലിന്റെ ഉദ്ഘാടനം നിര്‍വഹിച്ചു. സഹകരണ ബോര്‍ഡ് അംഗം വി.ബി ജയേഷ്, വാര്‍ഡ് വികസന സമിതി കണ്‍വീനര്‍ മണികണ്ഠന്‍ എന്നിവര്‍ പങ്കെടുത്തു. മോഹനന്‍, ബാബു, സുരേഷ്, അജിത്ത്, ശശി എന്നിവരാണ് കൃഷിയ്ക്ക് നേതൃത്വം നല്‍കുന്നത്.