മൂവാറ്റുപുഴ: പാര്‍ട്ടി സംഘടന ശക്തിപ്പെടുത്താന്‍ ബഹുമുഖ കര്‍മ പരിപാടികള്‍ ചര്‍ച്ചചെയ്ത് സി.പി.ഐ എറണാകുളം ജില്ലാ കിഴക്കന്‍ മേഖല ലീഡേഴ്‌സ് ക്യാംപ് സമാപിച്ചു.
ഇന്നലെ സി.പി.ഐ ജില്ലാ സെക്രട്ടറി പി.രാജു അവതരിപ്പിച്ച ഭാവിപ്രവര്‍ത്തന റിപ്പോര്‍ട്ടും അസിസ്റ്റന്റ് സെക്രട്ടറി കെ.എന്‍ സുഗതന്‍ അവതരിപ്പിച്ച സംഘടനാ റിപ്പോര്‍ട്ടിലും ക്യാംപ് അംഗങ്ങള്‍ മണ്ഡലാടിസ്ഥാനത്തില്‍ ഗ്രൂപ്പ് തിരിഞ്ഞ് ചര്‍ച്ച നടത്തി. തുടര്‍ന്ന് ചര്‍ച്ചയുടെ പൊതുഅവതരണം നടന്നു.
ഭാവിപ്രവര്‍ത്തന പരിപാടിയില്‍ നടന്ന ചര്‍ച്ചയില്‍ പി.രാജുവും സംഘടനരേഖയില്‍ നടന്ന ചര്‍ച്ചയ്ക്ക് കെ.എന്‍.സുഗതനും മറുപടി പറഞ്ഞു. പാര്‍ട്ടി സംഘടന എന്ന വിഷയത്തില്‍ മുന്‍എംഎല്‍എ ബാബുപോള്‍ ക്ലാസെടുത്തു. ഇ.കെ.ശിവന്‍, കെ.കെ.അഷറഫ്, കെ.എന്‍.ഗോപി, സി.എസ്.നാരായണന്‍ നായര്‍, എന്‍.അരുണ്‍, സി.വി.ശശി എന്നിവര്‍ പ്രസംഗിച്ചു.
രണ്ട് ദിവസങ്ങളിലായി മുവാറ്റുപുഴ ടൗണ്‍ ഹാളിലാണ് ക്യാമ്പ് നടന്നത്. അങ്കമാലി, പെരുമ്പാവൂര്‍, കോതമംഗലം, മൂവാറ്റുപുഴ, പിറവം, കൂത്താട്ടുകുളം മണ്ഡലങ്ങളില്‍ നിന്നുള്ള മണ്ഡലം സെക്രട്ടറിമാര്‍, മണ്ഡലം സെക്രട്ടറിയേറ്റ് അംഗങ്ങള്‍, ലോക്കല്‍ സെക്രട്ടറിമാര്‍, ബ്രാഞ്ച് സെക്രട്ടറിമാര്‍ എന്നിവര്‍ ക്യാംപില്‍ പങ്കെടുത്തു.