ന്യൂഡൽഹി: തടവുകാർക്ക് സൗജന്യവും സമയബന്ധിതവുമായ നിയമസഹായം ഉറപ്പാക്കണമെന്ന് സുപ്രിംകോടതി ഉത്തരവ്. ഇതു സംബന്ധിച്ച് ഹൈക്കോടതികൾ കീഴ്‌ക്കോടതികൾക്ക് നിർദേശം നൽകണമെന്നും ജസ്റ്റിസുമാരായ ബി.ആർ ഗവായ്, കെ.വി വിശ്വനാഥൻ എന്നിവരടങ്ങിയ ബെഞ്ച് ഉത്തരവിട്ടു. മനുഷ്യാവകാശ പ്രവർത്തകൻ സുഹാസ് ചക്മയുടെ ഹരജിയുടെ അടിസ്ഥാനത്തിലാണ് സുപ്രിംകോടതി ഉത്തരവ്. സൗജന്യ നിയമസഹായ സൗകര്യങ്ങളെക്കുറിച്ചുള്ള വിവരങ്ങൾ അതത് വെബ് പേജുകളിൽ നൽകാനും ഹൈക്കോടതികളോട് ആവശ്യപ്പെട്ടിട്ടുണ്ട്. 

സൗജന്യ നിയമസഹായം സംബന്ധിച്ച വിവരങ്ങൾ പരസ്യപ്പെടുത്തണം. പൊലിസ് സ്റ്റേഷനുകൾ, ബസ് സ്റ്റാൻഡുകൾ, പോസ്റ്റ് ഓഫിസുകൾ, റെയിൽവേ തുടങ്ങിയ പൊതു സ്ഥലങ്ങളിൽ അടുത്തുള്ള നിയമസഹായ ഓഫിസറുടെ വിലാസവും ബന്ധപ്പെടാനുള്ള നമ്പറും പ്രദർശിപ്പിക്കാൻ മതിയായ നടപടികൾ സ്വീകരിക്കണമെന്നും കോടതി നിർദേശിച്ചു. 
ഇത് പ്രാദേശിക ഭാഷയിലും ഇംഗ്ലീഷിലും ചെയ്യണം.

ലീഗൽ സർവിസസ് അതോറിറ്റിയുടെ വെബ്സൈറ്റുകളിലും ഇത് പ്രസിദ്ധീകരിക്കണം. അഖിലേന്ത്യാ റേഡിയോയിലും പ്രാദേശിക ഭാഷയിലുള്ള പ്രൊമോഷൻ കാംപയിനുകൾ നടത്തണം. ദേശീയ, സംസ്ഥാന, ജില്ല, താലൂക്ക് തലങ്ങളിൽ ലീഗൽ സർവിസസ് അതോറിറ്റികൾ നിലവിലുണ്ടെങ്കിലും ശിക്ഷാവിധി ചോദ്യം ചെയ്ത് ഉയർന്ന കോടതികളെ സമീപിക്കാനുള്ള സൗജന്യ നിയമസഹായത്തിനുള്ള നിലവിലെ അവകാശത്തെക്കുറിച്ച് അധികം പേർക്കും അറിയില്ലെന്ന് കേസിലെ അമിക്കസ് ക്യൂറി വിജയ് ഹൻസാരിയ ചൂണ്ടിക്കാട്ടി. 

പണമില്ലാത്തതിനാൽ അപ്പീൽ നൽകാനുള്ള അവകാശം നഷ്ടപ്പെടാതിരിക്കാൻ ഒരു സംവിധാനം ഏർപ്പെടുത്തേണ്ടത് അത്യാവശ്യമാണ്. ജയിൽ ലീഗൽ എയ്ഡ് ക്ലിനിക്കുകളിലെ അഭിഭാഷകർ നാലാഴ്ചയ്ക്കുള്ളിൽ രാജ്യത്തെ ഓരോ ജയിലുകളും സന്ദർശിക്കുകയും തടവുശിക്ഷ അനുഭവിക്കുന്ന കുറ്റവാളികളെ നേരിട്ട് ബന്ധപ്പെടുകയും ചെയ്യണം. ശിക്ഷാവിധിയെക്കുറിച്ചും  അയാൾക്ക് സൗജന്യ നിയമസഹായത്തിന് അർഹതയുണ്ടെന്നും അപ്പീൽ കോടതിയിൽ സൗജന്യമായി അപ്പീൽ ഫയൽ ചെയ്യാമെന്നും അവർ തടവുകാരനെ അറിയിക്കണമെന്നും ഹസാരിയ ആവശ്യപ്പെട്ടു.