മാവൂര്‍: ഒന്നര പതിറ്റാണ്ടോളമായി നവീകരണപ്രവൃത്തിയൊന്നും നടക്കാത്ത ചെറൂപ്പ-കുറ്റിക്കടവ് റോഡിന്റെ തകര്‍ച്ച സമ്പൂര്‍ണ്ണം. ശാസ്ത്രീയമായ അഴുക്കുചാല്‍ ഇല്ലാത്തതും റോഡിന് താങ്ങാനാകുന്നതിലേറെ ഭാരവുമായി നിരന്തരം ടിപ്പറുകള്‍ ഓടുന്നതും പലയിടങ്ങളിലും റോഡിന്റെ ഇരുവശങ്ങളിലും വെള്ളം കെട്ടിനില്‍ക്കുന്നതും തകര്‍ച്ചക്ക് ആക്കംകൂട്ടി.
അങ്ങാടിക്കുസമീപം നാല്‍ക്കവലയില്‍ വന്‍കുഴികളും വെള്ളക്കെട്ടും രൂപപ്പെട്ടത് യാത്രക്കാര്‍ക്കും വ്യാപാരസ്ഥാപനങ്ങള്‍ക്കും ഒരുപോലെ ദുരിതമായി. ചെറൂപ്പ പ്രാഥമികാരോഗ്യകേന്ദ്രത്തിലേക്കു വരുന്ന രോഗികളും മാവൂര്‍ ഗവ: ഹയര്‍സെക്കന്‍ഡറി, മണക്കാട് ഗവ. യു.പി സ്‌കൂളുകള്‍, ചെറൂപ്പ ഹിമായത്തുല്‍ ഇസ്‌ലാം ഹയര്‍സെക്കന്‍ഡറി മദ്‌റസ എന്നിവിടങ്ങളിലേക്കുള്ള നൂറുക്കണക്കിന് വിദ്യാര്‍ഥികളടക്കമുള്ള കാല്‍നടയാത്രക്കാര്‍ ജീവന്‍ പണയം വച്ചാണ് ഇതുവഴി നടന്നുപോകുന്നത്.
 റോഡരികില്‍ കാട് മൂടിക്കിടക്കുന്നതും ഒരിടത്തും ഫൂട്പാത്ത് ഇല്ലാത്തതുമാണ് യാത്ര ദുരിതമാക്കുന്നത്. റോഡരികില്‍ വന്‍കുഴികള്‍ രൂപപ്പെട്ടതിനാല്‍ വാഹനങ്ങള്‍ വരുമ്പോള്‍ കാല്‍നടയാത്രക്കാര്‍ക്ക് ഇറങ്ങിനില്‍ക്കാനും സ്ഥലമില്ല.
ചെറൂപ്പ ജംങ്ഷന്‍ മുതല്‍ ഇരുന്നൂറുമീറ്ററും ഖാദിബോര്‍ഡിന് സമീപമുള്ള ഇറക്കത്തിലും ഇരുവശത്തും ഫുട്പാത്ത് കോണ്‍ക്രീറ്റ് ചെയ്യുകയും മൂഴിപ്പുറത്ത്താഴം മുതല്‍ കുറ്റിക്കടവ് വരേ 500 മീറ്റര്‍ വയല്‍പ്രദേശത്ത് ഇരുവശവും സൈഡ്‌കെട്ടി രണ്ട് മീറ്റര്‍ ഉയര്‍ത്തുകയും ചെയ്താല്‍ ദുരിതത്തിന് ശാശ്വത പരിഹാരമാകും.
ഇരുവശവും ആവശ്യത്തിന് വീതിയുള്ളതിനാല്‍ റോഡ് വികസനത്തിന് സ്ഥലം ഏറ്റെടുക്കേണ്ടുന്ന ആവശ്യവുമില്ല. ഗ്രാമപഞ്ചായത്തിന്റെ അധീനതയിലുണ്ടായിരുന്ന റോഡ് വര്‍ഷങ്ങള്‍ക്കുമുമ്പ് പൊതുമരാമത്ത് വകുപ്പിനെ ഏല്‍പ്പിച്ചുകൊടുത്തിട്ടുണ്ടെങ്കിലും അതിനുശേഷം യാതൊരു നിര്‍മാണപ്രവൃത്തിയും പി.ഡബ്ല്യൂ.ഡി നടത്തിയിട്ടില്ല. സമീപപ്രദേശങ്ങശളിലെല്ലാം ഗതാഗതരംഗത്ത് വന്‍ വിപ്ലവമാണ് നടന്നത്. മാവൂര്‍-കുന്ദമംഗലം റൂട്ടില്‍ സര്‍വ്വീസ് നടത്തുന്ന ബസ്സുകളും അഞ്ചോളം എം സാന്റ് യൂണിറ്റിലേക്കുള്ള ടിപ്പറുകളും നിരന്തരംഓടുന്ന റോഡ് ഇന്ന് അനാഥമാണ്.
പത്ത് വര്‍ഷത്തിലേറെയായി യാതൊരു അറ്റക്കുറ്റപണിയും നടത്തിട്ടില്ലാത്ത റോഡില്‍ പത്ത്ടണ്‍ ഭാരം ചുമന്ന ടിപ്പറുകളാണ് ഓടുന്നത്.
കഴിഞ്ഞ യു.ഡി.എഫ് സര്‍ക്കാരിന്റെ കാലത്ത് നാട്ടുകാരുടെ നിരന്തര ആവശ്യത്തെതുടര്‍ന്ന് റോഡ് നവീകരണത്തിന് ഫണ്ട് അനുവദിക്കുന്നതിനുള്ള പ്രാഥമിക നടപടികള്‍ നടത്തിയിരുന്നു.
എല്ലാം ശരിയാക്കുമെന്ന വാഗ്ദാനവുമായി അധികാരത്തിലേറിയ സര്‍ക്കാരിലൂടെ റോഡിന് ശാപമോക്ഷമാകുമോയെന്നതാണ് ഇപ്പോള്‍ നാട്ടുകാര്‍ ഉറ്റുനോക്കുന്നത്.