ഉപയോക്താക്കള്‍ക്ക് സൗകര്യപ്രദമായ ഫീച്ചര്‍ അവതരിപ്പിക്കുന്ന തിരക്കിലാണ് ഇന്‍സ്റ്റന്റ് മെസേജിങ് ആപ്പായ വാട്‌സ്ആപ്പ്. ഇപ്പോഴിതാ മറ്റൊരു ഫീച്ചര്‍കൂടി അവതരിപ്പിച്ചിരിക്കുകയാണ്. പകുതി പൂര്‍ത്തിയാക്കിയ സന്ദേശങ്ങള്‍ സേവ് ചെയ്ത് വയ്ക്കാന്‍ സാധിക്കുന്നതാണ്  ഫീച്ചര്‍. 'മെസേജ് ഡ്രാഫ്റ്റ്' എന്ന പേരിലാണ് പുതിയ ഫീച്ചര്‍ അറിയപ്പെടുന്നത്. ഉപയോക്താക്കള്‍ ടൈപ്പ് ചെയ്തതും എന്നാല്‍ അയയ്ക്കാന്‍ മറന്നതുമായ സന്ദേശങ്ങള്‍ സൂക്ഷിക്കാന്‍ കഴിയുന്നതാണ് ഫീച്ചര്‍.

ഒരു സന്ദേശം ടൈപ്പുചെയ്യാന്‍ തുടങ്ങുകയും എന്നാല്‍ അത് അയയ്ക്കാതിരിക്കുകയും ചെയ്യുമ്പോള്‍, ഇത്തരത്തില്‍ നിങ്ങള്‍ അയക്കാത്ത മെസേജുകള്‍ 'ഡ്രാഫ്റ്റ്' എന്ന നിലയില്‍ പച്ച നിറത്തില്‍ കാണപ്പെടും. ഫീച്ചറിലൂടെ നിങ്ങള്‍ ടൈപ്പ് ചെയ്ത സന്ദേശങ്ങള്‍ തുടക്കം മുതല്‍ വീണ്ടും ടൈപ്പ് ചെയ്യാതെ തന്നെ പൂര്‍ണമാക്കി അയക്കാം.

ഫീച്ചര്‍ ആഗോളതലത്തില്‍ എല്ലാ ഉപയോക്താക്കള്‍ക്കുമായി ലഭ്യമാക്കുമെന്നാണ് റിപ്പോര്‍ട്ട്.