കൊച്ചി: മുനമ്പത്തെ വഖ്ഫ് ഭൂമി വിവാദം കത്തി നില്‍ക്കവെ സമീപ പ്രദേശത്തെ പ്രശസ്തമായ കുനമ്മാവ് റോമന്‍ കത്തോലിക്ക ചര്‍ച്ചിന്റെ കീഴിലുള്ള ഭൂമി കൈയേറ്റമാണെന്ന് കാണിച്ച് തിരുവിതാംകൂര്‍ ദേവസ്വം ബോര്‍ഡിന്റെ നോട്ടിസ്. ദേവസ്വം ബോർഡിന് വേണ്ടി സ്പെഷൽ തഹസിൽദാർ ആണ് നോട്ടിസ് നൽകിയിരിക്കുന്നത്. 

 മുനമ്പത്ത് നിന്നും 15 കിലോമീറ്റര്‍ അകലെ കോട്ടുവള്ളി വില്ലേജില്‍ കൂനമ്മാവ് സെന്റ് ഫിലോമിനാസ് പള്ളിക്ക് കീഴില്‍ പ്രവര്‍ത്തിക്കുന്ന  സാധുജന പരിപാലന സംഘത്തിന്റെ പേരിലുള്ള ഭൂമിക്കാണ് നോട്ടിസ്. സംഘം പ്രസിഡന്റ് തോമസ് പാറക്കലിനാണ് ദേവസ്വം  നോട്ടിസ് അയച്ചിരിക്കുന്നത്. ഇവിടത്തെ മൂന്നേക്കര്‍ ഭൂമിയില്‍,  കോന്നന്‍കുളങ്ങര ദേവസ്വം വക മുന്‍ സര്‍വേ നമ്പര്‍ 318/4 ലെ 1.74  ഏക്കര്‍ തിരുവിതാംകൂര്‍ ദേവസ്വത്തിന് അവകാശപ്പെട്ടതാണെന്നും ഈ ഭൂമിയില്‍ അനധികൃതമായി പ്രവേശിച്ചിരിക്കുകയാണെന്നും കാണിച്ചാണ് നോട്ടിസ്. 

ദേവസ്വം ആക്ടിലെ വ്യവസ്ഥകള്‍ പ്രകാരം നടപടിയെടുക്കാതിരാക്കാന്‍ നവംബർ 13-ാം തീയതി തിരുവനന്തപുരം നന്തന്‍കോട് ദേവസ്വംബോര്‍ഡ് ജംങ്ഷന് സമീപം പ്രവര്‍ത്തിക്കുന്ന ഭൂസംരക്ഷണ വിഭാഗം സ്‌പെഷല്‍ തഹസില്‍ദാര്‍ ഓഫിസില്‍ ഹാജരായി വിശദീകരണം നൽകണമെന്നാണ് സ്‌പെഷല്‍ തഹസില്‍ദാര്‍ പുറപ്പെടുവിച്ച നോട്ടിസിലുണ്ടായിരുന്നത്. കഴിഞ്ഞ ഒക്ടോബര്‍ 26നാണ് നോട്ടിസ് ഇറക്കിയത്.

13ന് ഹാജരാകാന്‍ കഴിയില്ലെന്നും സമയം നീട്ടി നല്‍കണമെന്നും സംഘം പ്രസിഡന്റ് ആവശ്യപ്പെട്ടതിനെ തുടര്‍ന്ന് വീണ്ടും ഡിസംബര്‍ അഞ്ചിന് ഹാജരാകണമെന്ന് തഹസില്‍ദാര്‍  അറിയിച്ചിട്ടുണ്ട്. കൂനമ്മാവിലെ സെന്റ് ഫിലോമിനാസ് ചര്‍ച്ചിന് സമീപത്ത് നിന്നും ഒന്നര കിലോമീറ്റര്‍ മാറി കോട്ടുവള്ളിയിലുള്ള മൂന്നേക്കര്‍ തെങ്ങുംപറമ്പില്‍ ഉള്‍പ്പെട്ടതാണ് ദേവസ്വത്തിന് അവകാശപ്പെട്ടതായി പറയുന്ന 1.74 ഏക്കര്‍ ഭൂമി.  

ഹൈക്കോടതി ദേവസ്വം ബെഞ്ചിന്റെ ഉത്തരവിനെ തുടര്‍ന്നാണ് ദേവസ്വം വസ്തുക്കള്‍ കൈകാര്യം ചെയ്യുന്ന സ്‌പെഷല്‍ തഹസില്‍ദാരോട് സംഘത്തിന്റെ ഉടമസ്ഥതയിലുള്ള ഭൂമി അളന്ന് തിട്ടപ്പെടുത്താന്‍ ഉത്തരവായത്. ഇതിൻ്റെ ഭാഗമായാണ് നോട്ടിസ് നൽകിയിരിക്കുന്നത്.  1969ല്‍ സ്വകാര്യ വ്യക്തിയില്‍ നിന്നും  വാങ്ങിയതാണ് ഭൂമിയെന്നാണ് കൈവശക്കാര്‍ പറയുന്നത്.