ചെന്നൈ: തമിഴ്‌നാട്ടില്‍ വീണ്ടും ശക്തമായ മഴ മുന്നറിയിപ്പ്.   ബംഗാള്‍ ഉള്‍ക്കടലില്‍ രൂപപ്പെട്ട ന്യൂനമര്‍ദത്തിനു പിന്നാലെയാണ് കേന്ദ്രകാലാവസ്ഥ വകുപ്പിന്റെ മുന്നറിയിപ്പ്. ചെന്നൈ ഉള്‍പ്പെടെ സംസ്ഥാനത്തെ 10 ജില്ലകളിലും കേന്ദ്രഭരണപ്രദേശമായ പുതുച്ചേരിയിലും കാരക്കലിലും വിദ്യാഭ്യാസ സ്ഥാപനങ്ങള്‍ക്ക് വ്യാഴാഴ്ച അവധി പ്രഖ്യാപിച്ചിരിക്കുകയാണ്. 

പുതുച്ചേരിയില്‍ ഇന്ന് ഓറഞ്ച് അലര്‍ട്ടാണ്. ചെന്നൈ കൂടാതെ തിരുവള്ളൂര്‍, വെല്ലൂര്‍, കാഞ്ചീപുരം, ചെങ്കല്‍പട്ട്, വില്ലുപുരം, കടലൂര്‍, മയിലാടുതുറൈ, തഞ്ചാവൂര്‍, രാമനാഥപുരം, ദിണ്ഡിക്കല്‍ ജില്ലകളിലാണ് അവധി.

തമിഴ്‌നാടിന് പുറമെ ആന്ധ്ര തീരത്തും ശക്തമായ മഴയുണ്ടാകുമെന്നാണ് കാലാവസ്ഥ വകുപ്പിന്റെ പ്രവചനം. ഡിസംബര്‍ ഏഴിനാണ് ബംഗാള്‍ ഉള്‍ക്കടലില്‍ ന്യൂനമര്‍ദം രൂപപ്പെട്ടത്. വെള്ളിയാഴ്ചവരെ മത്സ്യത്തൊഴിലാളികള്‍ കടലില്‍ പോകരുതെന്ന് മുന്നറിയിപ്പുണ്ട്.