ദുബായ്: 2024 മിഡിൽ ഈസ്റ്റിലെ മികച്ച താരത്തിനുള്ള ഗ്ലോബ് സോക്കർ അവാർഡ് സ്വന്തമാക്കി അൽ നാസർ നായകൻ ക്രിസ്റ്റ്യാനോ റൊണാൾഡോ. 2023-24 സൗദി പ്രൊ ലീഗ് സീസണിൽ അൽ നസറിനായി നടത്തിയ തകർപ്പൻ പ്രകടനങ്ങളാണ് റൊണാൾഡോയെ ഈ അവാർഡിന് അർഹനാക്കിയത്. 45 മത്സരങ്ങളിൽ നിന്നും 44 ഗോളുകളും 13 അസിസ്റ്റുകളുമായിരുന്നു റൊണാൾഡോ നേടിയിരുന്നത്. ഇതിൽ സൗദി ലീഗിൽ 35 ഗോളുകളുമാണ് റൊണാൾഡോ അടിച്ചുകൂട്ടിയത്. ഇതിനു പിന്നാലെ സൗദി പ്രൊ ലീഗിലെ ടോപ് സ്‌കോറർ ആവാനും റൊണാൾഡോക്ക് സാധിച്ചിരുന്നു. 

എന്നാൽ കഴിഞ്ഞ സീസണിൽ അൽ നസറിനൊപ്പം ഒരു കിരീടം പോലും നേടാൻ റൊണാൾഡോക്ക് സാധിച്ചിരുന്നില്ല. സൗദി ലീഗിൽ രണ്ടാം സ്ഥാനത്തായിരുന്നു അൽ നസർ കഴിഞ്ഞ സീസണിൽ ഫിനിഷ് ചെയ്തിരുന്നത്. 34 മത്സരങ്ങളിൽ നിന്നും 26 വിജയവും നാല് വീതം തോൽവിയും സമനിലയുമായി 82 പോയിന്റായിരുന്നു അൽ നസറിന് ഉണ്ടായിരുന്നത്. കഴിഞ്ഞ സീസണിൽ അൽ ഹിലാൽ ആയിരുന്നു സൗദി ലീഗിലെ ചാമ്പ്യൻമാരായത്. 

ഈ സീസണിലും റൊണാൾഡോ തകർപ്പൻ പ്രകടനങ്ങൾ തന്നെയാണ് സൗദിയിൽ കാഴ്ചവെച്ചുകൊണ്ടിരിക്കുന്നത്. അൽ നസറിനൊപ്പം ഈ സീസണിൽ 19 മത്സരങ്ങളിൽ കളത്തിലിറങ്ങിയ റൊണാൾഡോ 16 ഗോളുകളും മൂന്ന് അസിസ്റ്റുകളുമാണ് നേടിയിട്ടുള്ളത്. നിലവിൽ 13 മത്സരങ്ങൾ പിന്നിട്ടപ്പോൾ ഏഴു വിജയവും നാല് സമനിലയും രണ്ട് തോൽവിയുമായി 25 പോയിന്റോടെ നാലാം സ്ഥാനത്താണ് അൽ നസർ.