ചേലക്കര: ചേലക്കര മണ്ഡലത്തിന്റെ വിവിധ ഭാഗങ്ങളില്‍ പുലിയെ കണ്ട വാര്‍ത്തകളില്‍ ആശങ്കയോടെ ജനങ്ങള്‍ എളനാട്, പഴയന്നൂര്‍ തിരുവിലാമല എന്നിവിടങ്ങളിലാണ് ഇതിനകം നിരവധി പേര്‍ പുലിയെ കണ്ടതായി പറയുന്നത്. എല്ലാവരും ഒരേ സ്വരത്തില്‍ പുലിയെ കുറിച്ച് വിശദീകരിക്കുമ്പോള്‍  ആശങ്ക അപ്പാടെ തള്ളുകയാണ് വനപാലകര്‍.
പലരും കണ്ട ജീവി പുലിയാണെന്ന് സ്ഥിരീകരിക്കാന്‍ ആവശ്യമായ ഒരു ചെറിയ തെളിവ് പോലും ലഭ്യ മായിട്ടില്ലെന്ന് വനപാലകര്‍ പറയുന്നു. മൃഗങ്ങളെ വേട്ടയാടിയതിന്റെ സൂചനകളും ലഭ്യമായിട്ടില്ല   മൃഗങ്ങളുടെ ജഡാവശിഷ്ടങ്ങളും എവിടെ നിന്നും കണ്ടെത്താനായിട്ടില്ലെന്നും വനപാലകര്‍ അറിയിച്ചു.  തിരുവില്വാമല പുനര്‍ജനി ഗാര്‍ഡന് സമീപം വിമുക്ത ഭടന്‍ കുന്നത്ത് വീട്ടില്‍ ഗോപിനാഥന്റെ വീട്ടു പുറകിലാണ്  ഏറ്റവുമൊടുവില്‍ പുലിയെ കണ്ടെത്തിയതത്രെ. വീട്ടു മതിലിലേക്ക് രണ്ട് കാലുകളും എടുത്ത് വെച്ച നിലയിലായിരുന്നു പുലിയെന്ന് ഗോപിനാഥന്‍ പറയുന്നു.  കഴിഞ്ഞ ദിവസം അപ്പേക്കാട്ട് ഭാഗത്തും പുലിയെ കണ്ടതായി വാര്‍ത്ത പരന്നിരുന്നു. ഒരു വീടിന്റെ ടെറസില്‍ പുലിയെ കണ്ടെന്ന വാര്‍ത്ത വലിയ പരിഭ്രാന്തിയാണ് സൃഷ്ടിച്ചിരുന്നത്.
വിമുക്ത ഭടന്‍ ഗോപിനാഥന്റെ വീട്ടില്‍ വനപാലകരെത്തി ഇദ്ദേഹത്തില്‍ നിന്ന് വിവരങ്ങള്‍ ശേഖരിച്ചു പുലിയുടേതെന്ന് സംശയിക്കുന്ന കാല്‍പാടുകള്‍ പരിശോധിക്കുകയും ചെയ്തു. എന്നാല്‍ ഇത് പുലിയല്ലെന്ന് തന്നെയാണ് വനപാലകര്‍ ആണയിടുന്നത് പിന്നെ എന്ത് എന്ന് പറയാന്‍ അവര്‍ക്കും ആകുന്നില്ല.