വാഷിങ്ടണ്‍ ഡിസി: എച്ച്1ബി വിസ വിവാദങ്ങള്‍ക്കിടയില്‍, വൈറ്റ് കോളര്‍ ജോലികള്‍ക്ക് ആവശ്യമായ വൈദഗ്ധ്യമുള്ള തൊഴിലാളികള്‍ യുഎസില്‍ തന്നെ ഉണ്ടെന്നും കൂടുതല്‍ വിദേശികളെ ആവശ്യമില്ലെന്നും അമേരിക്കന്‍ വോട്ടര്‍മാരില്‍ അറുപത് ശതമാനം പേരും വിശ്വസിക്കുന്നതായി പുതിയ സര്‍വേ.

എലോണ്‍ മസ്‌ക്, വിവേക് രാമസ്വാമി തുടങ്ങിയ പ്രമുഖര്‍ എച്ച്1ബി വിസ വിപുലീകരണത്തിനുവേണ്ടി വാദിക്കുമ്പോള്‍ സ്റ്റീവ് ബാനണ്‍, നിക്കി ഹേലി, ലോറ ലൂമര്‍ തുടങ്ങിയവര്‍ എച്ച്1ബി വിസയെ എതിര്‍ക്കുന്നുണ്ട്.

നവംബറില്‍ നടത്തിയ റാസ്മുസെന്‍ സര്‍വ്വേ പ്രകാരം ഭൂരിഭാഗം അമേരിക്കക്കാരും ഇത്തരം നയങ്ങളെ എതിര്‍ക്കുകയും തൊഴില്‍ ക്ഷാമത്തിന് ആഭ്യന്തര പരിഹാരങ്ങള്‍ തിരഞ്ഞെടുക്കുകയും ചെയ്യണമെന്ന് ആഗ്രഹിക്കുന്നവരുമാണ്. ഇവരുടെ വീക്ഷണങ്ങളില്‍ നിന്ന് വ്യത്യസ്തമായി തൊഴിലാളികളുടെ ക്ഷാമം പരിഹരിക്കാന്‍ എച്ച്1ബി വിസ പ്രോഗ്രാം വിപുലീകരിക്കാന്‍ മസ്‌ക് ആവശ്യപ്പെട്ടിരുന്നു.

26 ശതമാനം അമേരിക്കക്കാരും ഉയര്‍ന്ന വൈദഗ്ധ്യമുള്ള ജോലികള്‍ക്കായി കൂടുതല്‍ വിദേശ തൊഴിലാളികളെ നിയമിക്കുന്നതിനെ അനുകൂലിക്കുന്നതായി റിപ്പോര്‍ട്ട് ചൂണ്ടിക്കാണിക്കുന്നു. അതേസമയം 60 ശതമാനം അമേരിക്കക്കാരും കരുതുന്നത് രാജ്യത്തിനകത്തു തന്നെ മതിയായ വൈദഗ്ധ്യമുള്ള വ്യക്തികള്‍ ഉണ്ടെന്നാണ്.