ഡൽഹി: 2024 ഒളിമ്പിക്സിൽ ഇരട്ട മെഡൽ നേടി തിളങ്ങിയ മനു ഭാക്കറേയും ലോക ചെസ് ചാമ്പ്യൻ ഡി ഗുകേഷ് ഉൾപ്പെടെയുള്ള നാല് അത്‌ലറ്റുകൾക്ക് രാജ്യം ഖേൽ രത്‌ന പുരസ്‌കാരം നൽകി ആദരിക്കുമെന്ന് ഇന്ത്യൻ കായിക മന്ത്രാലയം അറിയിച്ചു. ഖേൽ രത്‌ന പുരസ്‌കാര പട്ടികയിൽ ആദ്യം മനു ഭാക്കറിന്റെ പേര് ഇല്ലായിരുന്നു. എന്നാൽ പിന്നീട് ഈ പുരസ്കാരത്തിൽ താരം ഇടം പിടിക്കുകയായിരുന്നു.

ഇവർക്ക് പുറമെ ഇന്ത്യൻ പുരുഷ ഹോക്കി ടീം ക്യാപ്റ്റൻ ഹർമൻപ്രീത് സിംഗ്, പാരാലിമ്പ്യൻ പ്രവീൺ കുമാർ എന്നിവരും ഖേൽ രത്‌ന പുരസ്‌കാരത്തിന് നാമനിർദ്ദേശം ചെയ്യപ്പെട്ടു. 2024ലെ പാരീസ് ഒളിമ്പിക്സിൽ ഇന്ത്യൻ പുരുഷ ഹോക്കി ടീമിന് വെങ്കലം നേടിക്കൊടുക്കാൻ ഹർമൻപ്രീത് സിങ്ങിന് സാധിച്ചിരുന്നു. 2024  പാരാലിമ്പിക്സിൽ 2.08 മീറ്റർ ഹൈജംപിൽ സ്വർണം നേടിയാണ് പ്രവീൺ രാജ്യത്തിന്റെ അഭിമാനമായി മാറിയത്.

ജനുവരി 17ന് ന്യൂഡൽഹിയിലെ രാഷ്ട്രപതി ഭവനിൽ പ്രത്യേകം സംഘടിപ്പിച്ച ചടങ്ങിൽ ഇന്ത്യൻ രാഷ്ട്രപതി ദ്രൗപതി മുർമുവിൽ നിന്നായിരിക്കും ഇവർ ഖേൽരത്‌ന പുരസ്‌കാരം ഏറ്റുവാങ്ങുക.