മുംബൈ: വിമാനത്തിലെ ശുചിമുറിയിൽ സ്വർണം ഒളിപ്പിച്ച് കടത്താൻ ശ്രമിച്ച 24കാരൻ പിടിയിൽ. 2.1 കോടി രൂപയുടെ സ്വർണമാണ് പിടികൂടിയത്. മാലിദ്വീപിൽ നിന്ന് സ്വർണം കടത്തിയ 24 കാരനെ കസ്റ്റംസ് എയർ ഇന്‍റലിജൻസ് യൂണിറ്റാണ് പിടികൂടിയത്. കർണാടക സ്വദേശി ഇനാമുൽ ഹസനാണ് അറസ്റ്റിലായത്. 

മാലിദ്വീപിൽ നിന്ന് മുംബൈയിലേക്കുള്ള വിമാനത്തിൽ യാത്രക്കാരൻ സ്വർണം ഒളിപ്പിച്ചെന്ന രഹസ്യ വിവരം കസ്റ്റംസിന് ലഭിച്ചിരുന്നു. പരിശോധിച്ചപ്പോൾ ശുചിമുറിയിലെ ലൈറ്റ് പാനലിൽ ഒളിപ്പിച്ച നിലയിൽ സ്വർണം കണ്ടെത്തുകയായിരുന്നു. 13 പൗച്ചുകൾ കണ്ടെത്തിയതായി കസ്റ്റംസ് എയർ ഇന്‍റലിജൻസ് യൂണിറ്റ് പറഞ്ഞു.

ചോദ്യംചെയ്യലിൽ സ്വർണം ഒളിപ്പിച്ചത് താനാണെന്ന് ഇനാമുൽ ഹസൻ സമ്മതിച്ചതായി കസ്റ്റംസ് ഉദ്യോഗസ്ഥർ അറിയിച്ചു. പെട്ടെന്ന് പണക്കാരനാകാനാണ് സ്വർണക്കടത്തിന് ഇറങ്ങിയതെന്ന് യുവാവ് പറഞ്ഞു. ആരാണ് സ്വർണം കൊടുത്തുവിട്ടതെന്നും ആർക്ക് കൊടുക്കാനാണ് കൊണ്ടുവന്നതെന്നും കണ്ടെത്താൻ അന്വേഷണം ആരംഭിച്ചിട്ടുണ്ട്. സ്വർണം വിമാനത്താവളത്തിന് പുറത്തെത്തിക്കാൻ ഏതെങ്കിലും എയർപോർട്ട് ജീവനക്കാർ ഏറ്റിരുന്നോ എന്നും അന്വേഷം നടക്കുന്നുണ്ട്.