റിയാദ്: സഊദി പ്രൊ ലീഗിൽ അൽ നസറിന് തകർപ്പൻ വിജയം. അൽ അഖ്ദൗദിനെ ഒന്നിനെതിരെ മൂന്ന് ഗോളുകൾക്കാണ് അൽ നസർ പരാജയപ്പെടുത്തിയത്. മത്സരത്തിൽ സാദിയോ മാനെ ഇരട്ട ഗോൾ നേടി തിളങ്ങിയപ്പോൾ ക്രിസ്റ്റ്യാനോ റൊണാൾഡോ ഒരു ഗോളും നേടി.

മത്സരത്തിന്റെ 42ാം മിനിറ്റിൽ ലഭിച്ച പെനാൽറ്റി കൃത്യമായി ലക്ഷ്യത്തിൽ എത്തിക്കുകയായിരുന്നു റൊണാൾഡോ. സഊദി പ്രൊ ലീഗിലെ റൊണാൾഡോയുടെ 60ാം ഗോളായിരുന്നു ഇത്. ഈ ഗോളിന് പിന്നാലെ സഊദി ലീഗിൽ 60 ഗോളുകൾ പൂർത്തിയാക്കുന്ന ഏറ്റവും പ്രായം കുറഞ്ഞ താരമായി മാറാനും റൊണാൾഡോക്ക് സാധിച്ചു. 

മത്സരത്തിന്റെ 29, 88 എന്നീ മിനിറ്റുകളിലാണ് സാദിയോ മാനെയുടെ ഗോളുകൾ പിറന്നത്. സേവ്യർ ഗോഡ്വിൻ ആണ് അൽ അഖ്ദൗദിനായി ഗോൾ നേടിയത്. മത്സരത്തിൽ 71 ശതമാനം ബോൾ പൊസഷനും കൈപ്പിടിയിലാക്കിയ അൽ നസർ 14 ഷോട്ടുകളാണ് അൽ അഖ്ദൗദിന്റെ പോസ്റ്റിലേക്ക് ഉന്നം വെച്ചത്. ഇതിൽ ഏഴ് ഷോട്ടുകൾ ലക്ഷ്യത്തിലേക്ക് എത്തിക്കാൻ അൽ നസറിന് സാധിച്ചു.

ഈ തകർപ്പൻ വിജയത്തോടെ സഊദി പ്രൊ ലീഗ് പോയിന്റ് പട്ടികയിൽ മൂന്നാം സ്ഥാനത്തേക്ക് മുന്നേറാനും അൽ നസറിന് സാധിച്ചു. നിലവിൽ  നിലവിൽ 14 മത്സരങ്ങൾ പിന്നിട്ടപ്പോൾ എട്ട് വിജയവും നാല് സമനിലയും രണ്ട് തോൽവിയുമായി 28 പോയിന്റാണ് അൽ നസറിനുള്ളത്. ജനുവരി 17ന് അൽ താവൂണിനെതിരെയാണ് അൽ നസറിന്റെ അടുത്ത മത്സരം.