രോഹിത് ശർമയ്ക്ക് ശേഷം ഇന്ത്യൻ ടെസ്റ്റ് ടീമിനെ നയിക്കേണ്ട താരം ആരാണെന്ന് പറഞ്ഞിരിക്കുകയാണ് സുനിൽ ഗവാസ്കർ. ജസ്പ്രീത് ബുംറയെയാണ് സുനിൽ ഗവാസ്കർ അടുത്ത റെഡ് ബോൾ ക്യാപ്റ്റൻ ആയി തെരഞ്ഞെടുത്തത്. ചാനൽ 7ന് നൽകിയ അഭിമുഖത്തിൽ ആണ്  സുനിൽ ഗവാസ്‌കർ ഇക്കാര്യം പറഞ്ഞത്.

'അടുത്ത ഇന്ത്യൻ ടെസ്റ്റ് ക്യാപ്റ്റൻ ബുംറയായിരിക്കുമെന്ന് ഞാൻ കരുതുന്നു. അദ്ദേഹം മുന്നിൽ നിന്ന് നയിച്ചാൽ ഒരു ലീഡറിന്റെ അന്തരീക്ഷം ടീമിൽ ലഭിക്കും. ടീമിൽ വളരെയധികം സമ്മർദ്ദം ചെലുത്തുന്ന ചില ക്യാപ്റ്റൻമാരുണ്ട്. ബുംറ ആണെങ്കിലും നമുക്ക് അത് കാണാൻ സാധിക്കും. എല്ലാവരും ടീമിലെ അവരുടെ ജോലികൾ എന്താണെന്ന് കൃത്യമായി മനസിലാക്കുകയും അത് ചെയ്യുകയും ചെയ്യണം,' സുനിൽ ഗവാസ്കർ പറഞ്ഞു. 

അടുത്തിടെ അവസാനിച്ച ബോർഡർ-ഗവാസ്‌കർ ട്രോഫിയിലെ രണ്ട് ടെസ്റ്റുകളിൽ ഇന്ത്യയെ നയിച്ചിരുന്നത് ബുംറ ആയിരുന്നു. പരമ്പരയിലെ ആദ്യ മത്സരത്തിൽ ബുംറയുടെ കീഴിൽ തകർപ്പൻ വിജയം ആയിരുന്നു ഇന്ത്യ സ്വന്തമാക്കിയത്. എന്നാൽ പിന്നീട് നടന്ന മത്സരങ്ങളിൽ ഇന്ത്യ പരാജയപ്പെടുകയായിരുന്നു. പരമ്പരയിലെ അവസാന മത്സരത്തിൽ നിന്നും സ്വയം പിന്മാറിയ രോഹിത് ശർമയുടെ അഭാവത്തിലും ഇന്ത്യയെ നയിച്ചത് ബുംറ തന്നെയാണ്.