കൊച്ചി: 2007ല്‍ വണ്ടിപ്പെരിയാറില്‍ സ്ത്രീയെയും മകളെയും ബലാത്സംഗം ചെയ്ത് കൊലപ്പെടുത്തിയ കേസിലെ രണ്ടാം പ്രതിയുടെ വധശിക്ഷ ഹൈക്കോടതി റദ്ദാക്കി. പെരുവേലില്‍ പറമ്പില്‍ ജോമോന് തൊടുപുഴ അഡീ. സെഷന്‍സ് കോടതി (രണ്ട്) ജഡ്ജി വിധിച്ച വധശിക്ഷയാണ് പി.ബി സുരേഷ്‌കുമാര്‍, ജോബിന്‍ സെബാസ്റ്റ്യന്‍ എന്നിവരടങ്ങുന്ന ഡിവിഷന്‍ബെഞ്ച് റദ്ദാക്കിയത്. സാഹചര്യത്തെളിവുകളുടെ അടിസ്ഥാനത്തില്‍ മാത്രം വധ ശിക്ഷ വിധിച്ചത് അംഗീകരിക്കാനാവില്ലെന്ന് വ്യക്തമാക്കിയാണ് ഉത്തരവ്. എത്രയും വേഗം ഹരജിക്കാരനെ വിട്ടയക്കാനും കോടതി ഉത്തരവിട്ടു. 

ഒന്നാം പ്രതി രാജേന്ദ്രന്റെ വധശിക്ഷ ഹൈക്കോടതി നേരത്തെ ശരിവെച്ചിരുന്നു. ബലാത്സംഗത്തിന് 10 വര്‍ഷം കഠിന തടവും 25,000 രൂപ പിഴയും അതിക്രമിച്ച് കയറിയതിന് 10 വര്‍ഷം തടവും 25,000 രൂപ പിഴയും വേറെയും ശിക്ഷിച്ചിരുന്നു. 

കെട്ടിച്ചമച്ച തെളിവുകളുടെ അടിസ്ഥാനത്തിലാണ് തന്നെ പ്രതിയാക്കിയതെന്നായിരുന്നു ഹരജിക്കാരന്റെ വാദം. ഒന്നാം പ്രതി രാജേന്ദ്രന്‍ ചെയ്ത കുറ്റത്തിന് താന്‍ ഉത്തരവാദിയല്ലെന്നും വാദിച്ചു.