അബൂദബി: അടിയന്തര വാഹനങ്ങള്‍ക്ക് വഴിയൊരുക്കുന്നത് സംബന്ധിച്ച് വാഹനമോടിക്കുന്നവര്‍ക്കായി പുതിയ മാര്‍ഗനിര്‍ദേശങ്ങള്‍ പുറത്തിറക്കി അബൂദബി പോലിസ്. 'മടിക്കേണ്ട, ഉടനടി വഴിമാറുക' എന്ന കാമ്പയിന്റെ ഭാഗമായി, അടിയന്തര വാഹനങ്ങള്‍ക്ക് തടസ്സമില്ലാതെ കടന്നുപോകാന്‍ സൗകര്യമൊരുക്കണമെന്ന് അബൂദബി പൊലിസും അബൂദബി സിവില്‍ ഡിഫന്‍സ് അതോറിറ്റിയും വാഹനമോടിക്കുന്നവരോട് ആവശ്യപ്പെട്ടു.

ALSO READ: 200,000 വര്‍ഷങ്ങള്‍ക്ക് മുമ്പ് തന്നെ ആദിമമനുഷ്യ വാസം; ഷാര്‍ജയിലെ അല്‍ ഫായക്ക് യുനെസ്‌കോ അംഗീകാരം: അഭിമാന നേട്ടത്തെ അഭിനന്ദിച്ച് സാലം ഉമര്‍

അബൂദബി ആരോഗ്യ വകുപ്പിന്റെയും ഇന്റഗ്രേറ്റഡ് ട്രാന്‍സ്‌പോര്‍ട്ട് സെന്റര്‍ പ്രതിനിധീകരിക്കുന്ന മുനിസിപ്പാലിറ്റികളുടെ ഗതാഗത വകുപ്പിന്റെയും സഹകരണത്തോടെയാണ് കാമ്പയിന്‍ നടപ്പാക്കുന്നത്. വഴിമാറുന്നത് ഒരു ഓപ്ഷനല്ല, മറിച്ച് പ്രതികരണ സമയം കുറയ്ക്കാനും ജീവന്‍ രക്ഷിക്കാനും സഹായിക്കുന്ന മാനുഷികവും ധാര്‍മികവുമായ ഉത്തരവാദിത്തമാണെന്ന് കാമ്പയിന്‍ സംഘാടകര്‍ ഊന്നിപ്പറഞ്ഞു.

അടിയന്തര വാഹനങ്ങള്‍ക്ക് വഴിയൊരുക്കുമ്പോള്‍ പാലിക്കേണ്ട 6 മാര്‍ഗനിര്‍ദേശങ്ങള്‍:

പ്രധാന റോഡുകള്‍: അടിയന്തര വാഹനത്തിന്റെ സൈറണ്‍ കേള്‍ക്കുകയോ ലൈറ്റുകള്‍ കാണുകയോ ചെയ്താല്‍, ഉടന്‍ വലത് ലെയ്‌നിലേക്ക് മാറുക. കാരണം, അടിയന്തര വാഹനങ്ങള്‍ സാധാരണയായി ഇടത് ലെയ്‌നാണ് ഉപയോഗിക്കാറുള്ളത്.

ഗതാഗതക്കുരുക്ക്: റോഡ് ഷോള്‍ഡര്‍ അടിയന്തര വാഹനങ്ങള്‍ ഉപയോഗിക്കാം. അതിനാല്‍, മറ്റ് വാഹനങ്ങള്‍ റോഡ് ഷോള്‍ഡര്‍ ഉപയോഗിക്കുന്നത് നിരോധിച്ചിരിക്കുന്നു.

ഉള്‍വശത്തെ റോഡുകള്‍: ഗതാഗതത്തിനിടയില്‍ അടിയന്തര വാഹനങ്ങള്‍ കണ്ടെത്തിയാല്‍, വാഹനമോടിക്കുന്നവര്‍ ഉടന്‍ വലത്തോട്ടോ ഇടത്തോട്ടോ മാറി വഴി ഒഴിവാക്കണം.

ഇന്റര്‍സെക്ഷനുകള്‍: ഇന്റര്‍സെക്ഷനുകള്‍ ഒഴിവാക്കണം, അടിയന്തര വാഹനങ്ങളെ പിന്തുടരുന്നത് ഒഴിവാക്കുക. സൈറണ്‍ കേള്‍ക്കുകയോ ലൈറ്റുകള്‍ കാണുകയോ ചെയ്താല്‍, വലത്തോട്ടോ ഇടത്തോട്ടോ മാറി വഴിയൊരുക്കണം. ചുവപ്പ് ലൈറ്റ് തെളിഞ്ഞാല്‍, അവ മുറിച്ചുകടന്നേക്കാം; അപ്പോള്‍ ജാഗ്രതയോടെ മുന്നോട്ട് പോകുക. പച്ച ലൈറ്റ് തെളിഞ്ഞാലും, സൈഡ് റോഡുകളിലെ വാഹനങ്ങള്‍ പൂര്‍ണമായി നിര്‍ത്തി കാത്തിരിക്കണം.

റൗണ്ട്എബൗട്ടുകളും സ്‌ക്വയറുകളും: അടിയന്തര വാഹനങ്ങള്‍ റൗണ്ട്എബൗട്ടുകളിലേക്കും സ്‌ക്വയറുകളിലേക്കും ജാഗ്രതയോടെ സമീപിക്കും. സൈറണ്‍ കേള്‍ക്കുകയോ ലൈറ്റുകള്‍ കാണുകയോ ചെയ്താല്‍, റൗണ്ട്എബൗട്ടില്‍ പ്രവേശിക്കാതെ വഴിമാറണം. 

ഇരുവരിപ്പാതകള്‍: അടിയന്തര വാഹനങ്ങള്‍ റോഡിന്റെ മധ്യഭാഗത്തുകൂടി സഞ്ചരിക്കും. സൈറണ്‍ കേട്ടാലോ അവ കണ്ടാലോ, വലതുവശത്തേക്ക് മാറി വഴിയൊരുക്കണം. എതിര്‍ ദിശയില്‍ നിന്ന് വരുന്ന വാഹനങ്ങളും വലതുവശത്തേക്ക് മാറണം.

ALSO READ: അപകട രഹിത വേനല്‍ കാംപയിന്‍: ബോധവല്‍ക്കരണ വ്യത്യസ്ത അപകട വിഡിയോകള്‍ പങ്കിട്ട് അബൂദബി പൊലിസ്

മാര്‍ഗനിര്‍ദേശങ്ങള്‍ പാലിച്ച്, അടിയന്തര വാഹനങ്ങള്‍ക്ക് വഴിയൊരുക്കി ജീവന്‍ രക്ഷിക്കുന്നതിന് എല്ലാവരും സഹകരിക്കണമെന്ന് അബൂദബി പൊലിസ് ആവശ്യപ്പെട്ടു.