ന്യൂഡല്‍ഹി: ഡല്‍ഹിയില്‍ നിയമസഭാ തെരഞ്ഞെടുപ്പില്‍ യുവാക്കള്‍ക്കായി പ്രത്യേക പദ്ധതി പ്രഖ്യാപിച്ച് കോണ്‍ഗ്രസ്. തൊഴില്‍രഹിതരായ യുവാക്കള്‍ക്ക് പ്രതിമാസം 8500 രൂപ നല്‍കുന്ന യുവ ഉഡാന്‍ പദ്ധതി നടപ്പിലാക്കുമെന്ന് കോണ്‍ഗ്രസ് പറഞ്ഞു. ഒരു വര്‍ഷത്തേക്ക് തുക നല്‍കുന്ന പദ്ധതി കോണ്‍ഗ്രസ് നേതാവ് സച്ചിന്‍ പൈലറ്റാണ് വാഗ്ദാനം ചെയ്തത്. 

ഡല്‍ഹി സര്‍ക്കാരും, കേന്ദ്ര സര്‍ക്കാരും ഡല്‍ഹിയിലെ യുവാക്കളുടെ പ്രശ്‌നങ്ങള്‍ പരിഹരിക്കുന്നില്ലെന്ന് പദ്ധതി പ്രഖ്യാപിക്കവെ സച്ചിന്‍ പൈലറ്റ് പറഞ്ഞു. 
പദ്ധതി ഡല്‍ഹിയിലെ വിദ്യാസമ്പന്നരും തൊഴില്‍രഹിതരുമായ യുവാക്കള്‍ക്ക് ആശ്വാസമാകുമെന്നാണ് പ്രതീക്ഷ.

നേരത്തെ സ്ത്രീകളെ ലക്ഷ്യംവെച്ച് സമാനമായ വാഗ്ദാനവും കോണ്‍ഗ്രസ് നല്‍കിയിട്ടുണ്ട്. ഇതിനെല്ലാം പുറമെ പ്രത്യേക ആരോഗ്യ ഇന്‍ഷുറന്‍സ് പദ്ധതിയും കോണ്‍ഗ്രസ് ഡല്‍ഹിയില്‍ പ്രഖ്യാപിച്ചിരുന്നു. ശക്തമായ ത്രികോണപ്പോര് നടക്കുന്ന തലസ്ഥാനത്ത് ഭരണം തിരിച്ച് പിടിക്കാനുള്ള ശക്തമായ പ്രയത്‌നത്തിലാണ് കോണ്‍ഗ്രസ്.