തിരുവനന്തപുരം: സ്ഥാപിച്ച് ഒന്നര വര്‍ഷത്തിനുള്ളില്‍ മുതല്‍ മുടക്കിനേക്കാള്‍ ഇരട്ടിയിലധികം തുകയുടെ പിഴ ചുമത്തി എ.ഐ കാമറകള്‍. 2024 നവംബര്‍ 30 വരെയുള്ള കണക്ക് പ്രകാരം 565.16 കോടി രൂപയാണ് എ.ഐ കാമറകള്‍ വഴി കണ്ടെത്തിയ നിയമലംഘനങ്ങള്‍ക്ക് പിഴയായി ചുമത്തിയത്. ഇത്രയധികം തുക പിഴ ചുമത്തിയെങ്കിലും 100 കോടി രൂപയില്‍ താഴെയാണ് സര്‍ക്കാര്‍ ഖജനാവിലെത്തിയിരിക്കുന്നതെന്നാണ് കണക്കുകള്‍. പിടികൂടുന്ന നിയമലംഘനങ്ങളില്‍ 30 ശതമാനത്തില്‍ താഴെ മാത്രം ആളുകളാണ് പിഴ അടയ്ക്കുന്നത്. മറ്റുള്ളവ നിയമ നടപടികളിലാണ്. 

2023 ജൂണ്‍ അഞ്ച് മുതലാണ് സംസ്ഥാനത്ത് എ.ഐ കാമറകള്‍ പ്രവര്‍ത്തനം തുടങ്ങിയത്. 200 കോടിയോളം മുതല്‍മുടക്കി കെല്‍ട്രോണ്‍ വഴി  സംസ്ഥാനത്ത് 726 എ.ഐ കാ മറകകളാണ് മോട്ടോര്‍ വാഹന വകുപ്പ് സ്ഥാപിച്ചത്. എന്നാല്‍ ഒന്നര വര്‍ഷം പിന്നിട്ടപ്പോള്‍ 661 കാമറകള്‍ മാത്രമാണ് നിലവില്‍ പ്രവര്‍ത്തിക്കുന്നത്. 65 എണ്ണം പ്രവര്‍ത്തനരഹിതമാണ്. 86.78 ലക്ഷം നിയമലംഘനങ്ങള്‍ ഒന്നര വര്‍ഷത്തിനിടെ കണ്ടെത്തിയിട്ടുണ്ട്. 

നിയമലംഘനങ്ങൾ ഏറ്റവും കൂടൂതല്‍ നടത്തുന്നതും  പിഴ കൂടുതലായി അടക്കുന്നതും ബൈക്ക് യാത്രക്കാരാണ്. ഇതില്‍ ഹെല്‍മെറ്റ് ധരിക്കാതെ നിയമലംഘനം നടത്തിയവരാണ് ചെലാന്‍ ലഭിച്ചവരില്‍ ഏറെയും. 48 ലക്ഷത്തോളം നിയമലംഘനങ്ങളാണ് ഹെല്‍മെറ്റ് ധരിക്കാത്തതുമായി ബന്ധപ്പെട്ട് കാമറയിൽ  കുടുങ്ങിയത്.

ഇതില്‍ 30 ലക്ഷത്തോളം  ഹെല്‍മെറ്റിടാതെ വാഹനം ഓടിച്ചതിനും 18 ലക്ഷത്തോളം ഹെല്‍മെറ്റിടാതെ പിന്‍സീറ്റില്‍ യാത്ര ചെയ്തതിനുമാണ് പിഴ ചുമത്തിയിരിക്കുന്നത്. സീറ്റ് ബെല്‍റ്റ് ധരിക്കാതെ വാഹനം ഓടിച്ചതിന് 20 ലക്ഷത്തോളം നിയമലംഘനങ്ങളാണ് എ.ഐ കാമറ കണ്ണില്‍ കുടുങ്ങിയത്.