കോഴിക്കോട്: ലയണൽ മെസിയും അർജന്റീന ഫുട്ബോൾ ടീമും കേരളത്തിൽ പന്തുതട്ടാനെത്തുമെന്ന് കായിക മന്ത്രി വി അബ്ദുറഹ്മാന്‍ പറഞ്ഞിരുന്നു. ഒക്ടോബർ 25 മുതൽ നവംബർ രണ്ട് വരെ ഏഴ് ദിവസം മെസിയും സംഘവും കേരളത്തിൽ ഉണ്ടാവുമെന്നായിരുന്നു വി അബ്ദുറഹ്മാന്‍ അറിയിച്ചത്. 

എന്നാൽ തൊട്ടടുത്ത ദിവസം മന്ത്രി ഈ വിഷയത്തിൽ വ്യക്തമായ മറുപടി നൽകാതെ പോവുകയായിരുന്നു. അർജന്റീന ടീം എത്തുന്ന തീയതി കൃത്യമായി പിന്നീട് അറിയിക്കുമെന്നായിരുന്നു മന്ത്രി പറഞ്ഞത്. കോഴിക്കോട് നടന്ന ഒരു പരിപാടിയിലൂടെയാണ് മന്ത്രി ഇക്കാര്യം പറഞ്ഞത്. 

ഈ സാഹചര്യത്തിൽ ഒരു കലണ്ടർ ഇയറിൽ ഏത് മാസങ്ങളിലാണ് ഇന്റർനാഷണൽ സൗഹൃദ മത്സരങ്ങൾ നടക്കുക എന്നുള്ള ചർച്ചകളാണ് സജീവമായി നിലനിൽക്കുന്നത്. ഇന്റർനാഷണൽ ബ്രേക്കിന് വേണ്ടി ക്ലബ്ബുകൾ താരങ്ങളെ എപ്പോൾ ആണ് വിട്ടുനൽകേണ്ടത് എന്നതിനെക്കുറിച്ച് ഫിഫ കൃത്യമായ തീയതികൾ പുറത്തുവിട്ടിട്ടുണ്ട്.

ഒക്ടോബർ ആറ് മുതൽ 14 വരെയും നവംബർ 10 മുതൽ 18 വരെയുമാണ് ഫിഫ അന്താരാഷ്ട്ര മത്സരങ്ങൾ കളിക്കുന്നതിനുമുള്ള സമയം നൽകിയിട്ടുള്ളത്. അതുകൊണ്ട് തന്നെ എന്നാൽ ഒക്ടോബർ മാസത്തിന്റെ അവസാനത്തോടെ സൗഹൃദ മത്സരം കളിക്കാൻ അർജന്റീനയും മെസിയും എത്തുമോയെന്ന് കണ്ടുതന്നെ അറിയണം.