റിയാദ്: സഊദി ക്ലബ് അൽ നസറുമായി ക്രിസ്റ്റ്യാനോ റൊണാൾഡോ പുതിയ കരാർ ഒപ്പുവെക്കാൻ ഒരുങ്ങുന്നതായി റിപ്പോർട്ടുകൾ. ടീമുമായുള്ള പുതിയ കരാർ 2026 ജൂൺ വരെ റൊണാൾഡോ നീട്ടുമെന്നാണ് ലഭിക്കുന്ന വിവരങ്ങൾ. പുതിയ കരാറിന്റെ ഭാഗമായി റൊണാൾഡോക്ക് 200 മില്യൺ യൂറോ ലഭിക്കുമെന്നാണ് പ്രതീക്ഷിക്കുന്നത്. ഇതോടെ പ്രതിദിനം റൊണാൾഡോക്ക് അര മില്യൺ യൂറോ ലഭിക്കുമെന്നാണ് റിപ്പോർട്ടുകൾ. 

2023ൽ മാഞ്ചസ്റ്റർ യുണൈറ്റഡിൽ നിന്നുമാണ് റൊണാൾഡോ അൽ നസറിൽ എത്തുന്നത്. റൊണാൾഡോയുടെ വരവിന് പിന്നാലെ സഊദി ഫുട്ബോളിന് ലോക ഫുട്ബോളിൽ കൃത്യമായ ഒരു മേൽവിലാസം സൃഷ്ടിച്ചെടുക്കാൻ സാധിച്ചിരുന്നു. സഊദി വമ്പൻമാർക്ക് വേണ്ടി ഇതുവരെ തകർപ്പൻ പ്രകടനങ്ങളാണ് റൊണാൾഡോ നടത്തിക്കൊണ്ടിരിക്കുന്നത്. 

അൽ നസറിനായി 84 മത്സരങ്ങളിൽ ബൂട്ട് കെട്ടിയ റൊണാൾഡോ 75 ഗോളുകളും 18 അസിസ്റ്റുകളുമാണ് നേടിയിട്ടുള്ളത്. 2023-24 സീസണിൽ 45 മത്സരങ്ങളിൽ നിന്നും 44 ഗോളുകളും 13 അസിസ്റ്റുകളുമായിരുന്നു റൊണാൾഡോ നേടിയിരുന്നത്. ഇതിൽ സഊദി ലീഗിൽ 35 ഗോളുകളുമാണ് റൊണാൾഡോ അടിച്ചുകൂട്ടിയത്. സഊദി പ്രോ ലീഗിലെ കഴിഞ്ഞ സീസണിലെ ടോപ് സ്കോററും റൊണാൾഡോ തന്നെയാണ്. 

ഈ സീസണിലും റൊണാൾഡോ തകർപ്പൻ പ്രകടനങ്ങൾ തന്നെയാണ് അൽ നസറിനൊപ്പം നടത്തിക്കൊണ്ടിരിക്കുന്നത്. സീസണിൽ 19 മത്സരങ്ങളിൽ നിന്നും 17 ഗോളുകളും മൂന്ന് അസിസ്റ്റുകളുമാണ് റൊണാൾഡോ നേടിയിട്ടുള്ളത്. നിലവിൽ 14 മത്സരങ്ങൾ പിന്നിട്ടപ്പോൾ എട്ട് വിജയവും നാല് സമനിലയും രണ്ട് തോൽവിയുമായി 25 പോയിന്റോടെ നാലാം സ്ഥാനത്താണ് അൽ നസർ.