ദോഹ: 15 മാസത്തിലേറെയായി ഗസ്സയില്‍ ഇസ്‌റാഈല്‍ നടത്തിവരുന്ന കൂട്ടക്കൊല അവസാനിപ്പിക്കാനുള്ള വെടിനിര്‍ത്തല്‍ കരാര്‍ ഹമാസ് അംഗീകരിച്ചു. ഖത്തര്‍ മധ്യസ്ഥതയില്‍വന്ന കരാര്‍ അംഗീകരിച്ചതായി ഹമാസ് പ്രതിനിധി ഖലീല്‍ അല്‍ ഹയ്യ അല്‍ജസീറയോട് പറഞ്ഞു.

ഇക്കാര്യത്തില്‍ ഇസ്‌റാഈല്‍ തീരുമാനം നാളെ ഉണ്ടാകും. കരാര്‍ അംഗീകരിക്കുന്നത് സംബന്ധിച്ച് ഇസ്‌റാഈല്‍ കാബിനറ്റില്‍ നാളെ വോട്ടെടുപ്പ് നടത്തും. ഇന്ന് യൂറോപ്യന്‍ പര്യടനത്തിന് പുറപ്പെട്ട വിദേശകാര്യമന്ത്രി ജിഡ്യോന്‍ സാര്‍ കാബിനറ്റ് യോഗത്തില്‍ പങ്കെടുക്കാനായി യാത്ര റദ്ദാക്കി നാട്ടിലേക്ക് മടങ്ങിയിട്ടുണ്ട്.

പിന്നാലെ ഇക്കാര്യത്തില്‍ അടുത്ത ഏതു മണിക്കൂറിലും ഔദ്യോഗിക പ്രഖ്യാപനം ഉണ്ടാകുമെന്ന് യു.എസ് വിദേശകാര്യ സെക്രട്ടറി ആന്റണി ബ്ലിങ്കനും അറിയിച്ചു. വെടിനിര്‍ത്തല്‍ കരാര്‍ സംബന്ധിച്ച പ്രഖ്യാപനം നടത്താന്‍ ഖത്തര്‍ പ്രധാനമന്ത്രിയും വിദേശകാര്യമന്ത്രയുമായ മുഹമ്മദ് ബിന്‍ അബ്ദുര്‍റഹമാന്‍ ബിന്‍ ജാസിം അല്‍ഥാനി നാളെ വാര്‍ത്താസമ്മേളനം വിളിച്ചിട്ടുണ്ട്. മധ്യസ്ഥചര്‍ച്ചകള്‍ക്ക് നേതൃത്വം കൊടുത്തത് ഖത്തര്‍ പ്രധാനമന്ത്രിയായിരുന്നു.

ഖത്തര്‍, യു.എസ്, ഈജിപ്ത് ഇടനിലക്കാരാണ് കരട് രേഖ സമര്‍പ്പിച്ചത്. ദ്യഘട്ടത്തില്‍ ആറാഴ്ച നീളുന്ന വെടിനിര്‍ത്തലാണ് കരാറില്‍ പറയുന്നത്. ബന്ദികളെ മോചിപ്പിക്കുന്നതിന് പകരമായി വെടിനിര്‍ത്തല്‍ എന്നതാണ് കരാറിന്റെ കാതല്‍. മൂന്നു ഘട്ടങ്ങളിലായി ബന്ദി മോചനവും വെടിനിര്‍ത്തലും പൂര്‍ണമായി നടപ്പാക്കും. 33 ബന്ദികളെ ഹമാസ് കൈമാറിയേക്കുമെന്നാണ് റിപ്പോര്‍ട്ട്. എന്നാല്‍ ഇക്കാര്യത്തില്‍ ഔദ്യോഗിക സ്ഥിരീകരണങ്ങള്‍ വന്നിട്ടില്ല.

ദോഹയില്‍ നടന്ന ചര്‍ച്ചയില്‍ ഇതുസംബന്ധിച്ച രൂപം മുഹമ്മദ് ബിന്‍ അബ്ദുറഹ്മാന്‍ ഇരുവിഭാഗത്തിന് മുമ്പാകെ സമര്‍പ്പിച്ചു. യോഗത്തിന് ഹമാസിന്റെ പ്രതിനിധികളും ഇസ്‌റാഈല്‍ ചാരസംഘടനയായ മൊസാദിന്റെയും ആഭ്യന്തരരഹസ്യാന്വേഷണ ഏജന്‍സി ഷിന്‍ബെറ്റിന്റെയും ഉന്നതരും സംബന്ധിച്ചിരുന്നു.

യു.എസ് പ്രസിഡന്റായി ഡൊണാള്‍ഡ് ട്രംപ് ഈമാസം 20ന് അധികാരമേല്‍ക്കുന്നതിന് മുന്നോടിയായി പശ്ചിമേഷ്യയില്‍ സമാധാനം പുനസ്ഥാപിക്കാനുള്ള തീവ്രശ്രമങ്ങളാണ് നടക്കുന്നത്. ഈ സാഹചര്യത്തിലാണ് ഖത്തറിന്റെയും ഈജിപ്തിന്റെയും മേല്‍നോട്ടത്തില്‍ മധ്യസ്ഥചര്‍ച്ചകള്‍ക്ക് ജീവന്‍വച്ചതും നടപടികള്‍ വേഗത്തിലാക്കിയതും.

Hamas approved Gaza ceasefire deal as Qatar to hold news conference