റിയാദ്; റോഡ് സുരക്ഷയ്ക്കായി സഊദിയിൽ ഇനി അത്യാധുനിക സാങ്കേതിക വിദ്യയിലുള്ള ഡ്രോണുകൾ. റഡാറുകളും സെൻസറുകളും ക്യാമറകളും ഘടിപ്പിച്ച ഡ്രോണുകൾക്ക് 6,000 മീറ്റർ ഉയരത്തിൽ വരെ പറക്കാൻ കഴിയുമെന്നാണ് അധികൃതർ അറിയിച്ചിട്ടുള്ളത്.

സഊദി ആഭ്യന്തര മന്ത്രാലയത്തിലെ റോഡ് സുരക്ഷാ വിഭാഗമാണ് ഇതു സംബന്ധിച്ച പ്രഖ്യാപനം നടത്തിയത്. സുരക്ഷ ഉറപ്പാക്കുന്നതിനായി നൂതന സാങ്കേതിക വിദ്യയിലുള്ള ഡ്രോണുകളെയാണ് ഉപയോഗിക്കുക. പ്രവർത്തനങ്ങൾ സുഗമമാക്കുന്നതിനായി പൂർണമായും ഇലക്ട്രിക് എൻജിനിൽ പ്രവർത്തിക്കുന്ന ഡ്രോണുകളാണിവയെന്ന് റോഡ് സുരക്ഷയ്ക്കായുള്ള പ്രത്യേക വിഭാഗത്തിലെ കേണൽ അദേൽ അൽ മുതെയ്റി വ്യക്തമാക്കി.

അടിയന്തര സാഹചര്യങ്ങളിൽ റോഡ് സുരക്ഷ വർധിപ്പിക്കാനും, വേഗത്തിൽ പിന്തുണ നൽകാനും ഡ്രോണുകൾക്ക് സാധിക്കും. അതേസമയം, കൂട്ടിമുട്ടലുകൾ ഒഴിവാക്കാനും ലാൻഡിങ്ങിൽ സഹായിക്കുന്നതിനുമായി ഡ്രോണുകളിൽ റഡാറുകളും സെൻസറുകളും ഘടിപ്പിച്ചിട്ടുണ്ട്. ഇതിനു പുറമെ ഒപ്റ്റിക്കൽ, തെർമൽ ചിത്രങ്ങളെടുക്കാൻ കഴിയുന്ന 30 എക്‌സ് സൂം ലെൻസുകളുള്ള ഇരട്ട ക്യാമറകളും ഡ്രോണുകളിൽ ഘടിപ്പിച്ചിട്ടുണ്ട്. 50 കിലോമീറ്റർ പരിധിക്കുള്ളിൽ ഉയർന്ന കൃത്യതയോടെ വസ്‌തുക്കളെ തിരിച്ചറിയാനും വിലയിരുത്താനും സാധിക്കുന്ന ക്യാമറകളാണിത്.

കഴിഞ്ഞ ദിവസം സമാപിച്ച ഹജ്ജ് പ്രദർശന-സമ്മേളനത്തിലെ ആഭ്യന്തര മന്ത്രാലയത്തിൻ്റെ പവിലിയനിൽ പുതിയ ഡ്രോണുകൾ പ്രദർശിപ്പിച്ചിരുന്നു. ഉയർന്ന താപനില, പൊടി, മഴ തുടങ്ങിയ മോശം കാലാവസ്‌ഥകളിലും മികച്ച രീതിയിൽ പ്രവർത്തിക്കാൻ ശേഷിയുള്ളതാണ് ഡ്രോണുകൾ. ഇവ രേഖപ്പെടുത്തുന്ന വിവരങ്ങളുടെ സ്വകാര്യത ഉറപ്പാക്കുന്നതിനും ഹാക്കിങ് പ്രതിരോധിക്കാനുമായി എഇഎസ് 128 എൻക്രിപ്ഷൻ ഉപയോഗിച്ച് ഡ്രോണുകളെ സുരക്ഷിതമാക്കിയിട്ടുണ്ട്.

Saudi Arabia introduces cutting-edge drones with a 50km range to enhance road safety, leveraging innovative technology for traffic monitoring and enforcement.