തിരുവനന്തപുരം: വിവിധ ആവശ്യങ്ങള്‍ ഉന്നയിച്ച് സംസ്ഥാനത്തെ സര്‍ക്കാര്‍ ജീവനക്കാരും അധ്യാപകരും ഇന്ന് പണിമുടക്കുന്നു. പ്രതിപക്ഷ സര്‍വിസ് സംഘടനയായ സ്റ്റേറ്റ് എംപ്ലോയീസ് ആന്‍ഡ് ടീച്ചേഴ്സ് ഓര്‍ഗനൈസേഷനും (സെറ്റോ) സി.പി.ഐയുടെ സംഘടനയായ ജോയിന്റ് കൗണ്‍സിലുമാണ് പണിമുടക്കിന് ആഹ്വാനംചെയ്തിരിക്കുന്നത്. സമരം തുടങ്ങിയതിന് പിന്നാലെ കൊല്ലത്ത് ജോയിന്റ് കൗണ്‍സില്‍ നിര്‍മിച്ച സമരപ്പന്തല്‍ പൊലിസ് പൊളിച്ചുനീക്കി. 

പങ്കാളിത്ത പെൻഷൻ പിൻവലിക്കാമെന്ന സർക്കാർ തീരുമാനം നടപ്പിലാക്കുക, കുടിശ്ശിക ക്ഷാമബത്ത അനുവദിക്കുക, ശമ്പള പരിഷ്‌കരണ നടപടികൾ ആരംഭിക്കുക, മരവിപ്പിച്ച ലീവ് സറണ്ടർ പണമായി നൽകുക, ആരോഗ്യ ഇൻഷുറൻസ് സർക്കാർ ഏറ്റെടുത്തു നടപ്പിലാക്കുക, 11ാം ശമ്പള പരിഷ്‌കരണ കുടിശ്ശിക അനുവദിക്കുക, കേന്ദ്രം കേരളത്തോട് കാണിക്കുന്ന സാമ്പത്തിക വിവേചനം അവസാനിപ്പിക്കുക എന്നീ ആവശ്യങ്ങൾ ഉന്നയിച്ചാണ് സമരസമിതി പണിമുടക്ക് നടത്തുന്നത്.

പണിമുടക്ക് നേരിടാന്‍ സര്‍ക്കാര്‍ ഡയസ്‌നോണ്‍ പ്രഖ്യാപിച്ചിട്ടുണ്ട്. പണിമുടക്കുന്ന ജീവനക്കാരുടെ ഒരു ദിവസത്തെ ശമ്പളം ഫെബ്രുവരിയിലെ ശമ്പളത്തില്‍ നിന്ന് കുറയ്ക്കുമെന്ന് ഉത്തരവില്‍ പറയുന്നു. അനധികൃത അവധികള്‍ ഡയസ്‌നോണ്‍ ആയി കണക്കാക്കാനും തീരുമാനമായി.