ബംഗളൂരു: മുസ്ലിം സമുദായത്തിനെതിരേ വിദ്വേഷ പരാമര്‍ശങ്ങള്‍ നടത്തിയ ബി.ജെ.പി ദേശീയ വക്താവും ന്യൂനപക്ഷ മോര്‍ച്ച നേതാവുമായ നാസിയ ഇലാഹി ഖാനെതിരേ ബെലഗാവി പൊലിസ് കേസെടുത്തു. ജനുവരി 19ന് സുലേഭാവിയില്‍ ഹിന്ദുത്വ സംഘടനയുടെ പരിപാടിയില്‍ പങ്കെടുക്കവെ നടത്തിയ പ്രസംഗത്തിലാണ് നാസിയ ഇലാഹി ഖാന്‍ മുസ്്‌ലിംകള്‍ക്കെതിരേ അധിക്ഷേപ പരാമര്‍ശങ്ങള്‍ നടത്തിയത്. നസിയ ഇലാഹിക്കെതിരേ ബെലഗാവിയില്‍ വന്‍ പ്രതിഷേധ പ്രകടനം നടന്നിരുന്നു.

നിയമസഭാ തെരഞ്ഞെടുപ്പ് നടക്കുന്ന ഡല്‍ഹിയില്‍ പ്രചാരണത്തിനിടെ മുസ്ലിംകളെ ലക്ഷ്യംവച്ച് വിദ്വേഷം പ്രസംഗം നടത്തിയതിന്റെ പേരില്‍ നാസിയ ഇലാഹി ഖാനെതിരെ പൗരാവകാശ സംഘടനയായ സിറ്റിസണ്‍ ഫോര്‍ ജസ്റ്റിസ് ആന്‍ഡ് പീസ് (സി.ജെ.പി) ഡല്‍ഹി ചീഫ് ഇലക്ടറല്‍ ഓഫിസര്‍ ആര്‍. ആലീസ് വാസിന് പരാതി നല്‍കിയിരുന്നു.  മുസ്‌ലിംകളോട് നല്ലത് എന്ത് പറഞ്ഞാലും അനുസരിക്കില്ലെന്നും എന്നാല്‍ ബലാത്സംഗം ചെയ്യാന്‍ പറഞ്ഞാല്‍ ഉടന്‍ അത് ചെയ്യുമെന്നതുള്‍പ്പെടെയുള്ള പരാമര്‍ശത്തിനെതിരേയാണ് പരാതി.

ഈ മാസം അഞ്ചിന് ഡല്‍ഹിയില്‍ നടന്ന പരിപാടിക്കിടെയായിരുന്നു വിദ്വേഷം പ്രസംഗിച്ചത്. പ്രസംഗം ബി.എന്‍.എസ് വകുപ്പ് പ്രകാരം മാത്രമല്ല, മാതൃകാ പെരുമാറ്റച്ചട്ടത്തിന്റെയും 1950ലെ ജനപ്രാതിനിധ്യ നിയമത്തിലെ വ്യവസ്ഥകളുടെയും വ്യക്തമായ ലംഘനമാണെന്നും പരാതിയില്‍ ചൂണ്ടിക്കാട്ടി. വിദ്വേഷപ്രസംഗം പതിവാക്കിയ നാസിയക്കെതിരേ നേരത്തെയും വിവിധ പരാതികള്‍ നിലവിലുണ്ട്. ഇതിന് പുറമെയാണ് കര്‍ണാടക പോലീസിന്റെ നടപടി.

Hate speech: Case filed against BJP leader Nazia Elahi Khan in Karnataka