വാഷിങ്ടണ്‍: നോമിലേക്ക് പുറപ്പെട്ട് യാത്രമാധ്യേ അലാസ്‌കയ്ക്ക് മുകളില്‍ കാണാതായ യാത്രാവിമാനം മഞ്ഞുപാളികളില്‍ ഇടിച്ച് തകര്‍ന്നതായി കണ്ടെത്തി. വിമാനത്തിലുണ്ടായിരുന്ന 10 പേരും കൊല്ലപ്പെട്ടതായാണ് റിപ്പോര്‍ട്ട്. 

ബെറിങ് എയറിന്റെ സെസ്സ്ന വിമാനമാണ് അലസ്‌കയ്ക്ക് സമീപം യാത്രാ മധ്യേ കാണാതായത്. വിമാനത്തില്‍ 9 യാത്രക്കാരും ഒരു പൈലറ്റുമാണ് ഉണ്ടായിരുന്നത്. 

വിമാനം അവസാനമായി കണ്ട സ്ഥലം അടിസ്ഥാനമാക്കി യു.എസ് കോസ്റ്റ് ഗാര്‍ഡ് നടത്തിയ തെരച്ചിലിലാണ് വിമാനത്തിന്റെ അവശിഷ്ടങ്ങള്‍ കണ്ടെത്തിയത്. നോമില്‍ നിന്ന് തെക്ക് കിഴക്ക് ഏകദേശം 48 കിലോമീറ്റര്‍ അകലെയാണ് വിമാനം തകര്‍ന്നുവീണത്. 

വ്യാഴാഴ്ച്ച ഉച്ചയ്ക്ക് ശേഷം ഉനലക്ലീറ്റില്‍ നിന്നാണ് വിമാനം യാത്ര തിരിച്ചത്. പിന്നാലെ വൈകീട്ട് നാല് മണിയോടെ വിമാനത്തില്‍ നിന്നുള്ള ബന്ധം നഷ്ടപ്പെടുകയായിരുന്നു. 

അപകടസമയത്ത് നേരിയ മഞ്ഞുവീഴ്ച്ചയും മൂടല്‍മഞ്ഞും ഉണ്ടായിരുന്നുവെന്നും അന്തരീക്ഷ താപനില മൈനസ് എട്ട് ഡിഗ്രി ആയിരുന്നുവെന്നുമാണ് റിപ്പോര്‍ട്ട്. 

തെരച്ചിലില്‍ മൂന്ന് മൃതദേഹങ്ങളാണ് നിലവില്‍ കണ്ടെത്തിയിരിക്കുന്നത്. മറ്റ് മൃതദേഹങ്ങള്‍ പുറത്തെത്തിക്കാനുള്ള ശ്രമങ്ങള്‍ തുടരുകയാണെന്ന് യു.എസ് കോസ്റ്റ്ഗാര്‍ഡ് അറിയിച്ചു. 

എട്ടുദിവസത്തിനിടെ അമേരിക്കയിലുണ്ടാകുന്ന മൂന്നാമത്തെ വലിയ വിമാനാപകടമാണ് അലാസ്‌കയിലേത്. കഴിഞ്ഞ ദിവസം ചെറു വിമാനം അമേരിക്കയില്‍ തകര്‍ന്നു വീണിരുന്നു. ഈ അപകടത്തില്‍ 67 പേരാണ് കൊല്ലപ്പെട്ടത്. ജനുവരി 31 ന് ഫിലാഡല്‍ഫിയയിലും വിമാനം തകര്‍ന്ന് 7 പേര്‍ കൊല്ലപ്പെട്ടിരുന്നു.