ദുബായ്: ഐഎൽ ടി-20 ലീഗ് ചാമ്പ്യൻമാരായി ദുബായ് ക്യാപ്പിറ്റൽസ്. കലാശപ്പോരാട്ടത്തിൽ ഡെസേർട്ട് വൈപ്പേഴ്സിനെ നാല് വിക്കറ്റുകൾക്ക് തകർത്താണ് ദുബായ് ക്യാപ്പിറ്റൽസ് കിരീടം സ്വന്തമാക്കിയത്. മത്സരത്തിൽ ആദ്യം ബാറ്റ് ചെയ്ത വൈപ്പേഴ്സ് 20 ഓവറിൽ അഞ്ചു വിക്കറ്റ് നഷ്ടത്തിൽ 185 റൺസാണ് നേടിയത്. വിജയലക്ഷ്യം പിന്തുടർന്നിറങ്ങിയ ക്യാപ്പിറ്റൽസ് 19.2 ഓവറിൽ ആറ് വിക്കറ്റ് നഷ്ടത്തിൽ ലക്ഷ്യം മറികടക്കുകയായിരുന്നു. 

ഐപിഎൽ ടീമായ ദൽഹി ക്യാപ്പിറ്റൽസിന്റെ ഫ്രാഞ്ചൈസി ടീമാണ് ദുബായ് ക്യാപ്പിറ്റൽസ്. ചരിത്രത്തിൽ ആദ്യമായാണ് ഡൽഹി ക്യാപ്പിറ്റൽസിന്റെ ടീം ഒരു ടൂർണമെന്റിൽ കിരീടം സ്വന്തമാക്കുന്നത്. ഇന്ത്യൻ പ്രീമിയർ ലീഗിൽ 17 ഒരിക്കൽ പോലും ഡൽഹിക്ക് കിരീടം സ്വന്തമാക്കാൻ സാധിച്ചിട്ടില്ല. അതുകൊണ്ട് തന്നെ തങ്ങളുടെ ആദ്യ കിരീടമാണ് ദുബായ് ക്യാപ്പിറ്റൽസ് ഇപ്പോൾ സ്വന്തമാക്കിയിരിക്കുന്നത്. 

മത്സരത്തിൽ ക്യാപ്പിറ്റൽസിന്‌ വേണ്ടി റോവ്മൻ പവൽ 38 പന്തിൽ 63 റൺസ് നേടി മികച്ച പ്രകടനമാണ് നടത്തിയത്. ഏഴ് ഫോറുകളും മൂന്ന് സിക്സുമാണ് പവൽ അടിച്ചെടുത്തത്. ഷായ് ഹോപ് 39 പന്തിൽ 43 റൺസും സിക്കന്ദർ റാസ 12 പന്തിൽ 34 റൺസും നേടി വിജയത്തിൽ നിർണായകമായ പങ്കുവഹിച്ചു. 

ആദ്യം ബാറ്റ് ചെയ്ത ഡെസേർട്ടിനായി മാക്സ് ഹോൾഡനും സാം കറനും അർദ്ധ സെഞ്ച്വറി നേടി മികച്ച പ്രകടനമാണ് നടത്തിയത്. ഹോൾഡൻ 51 പന്തിൽ 76 റൺസാണ് നേടിയത്. 10 ഫോറുകൾ അടങ്ങുന്നതായിരുന്നു താരത്തിന്റെ ഇന്നിങ്സ്. സാം കറൻ 33 പന്തിൽ പുറത്താവാതെ 62 റൺസും നേടി. അഞ്ചു ഫോറുകളും മൂന്ന് സിക്സുമാണ് താരം നേടിയത്.