ലണ്ടൻ: ലണ്ടനിൽ നിന്ന് ആംസ്‌റ്റർഡാമിലേക്കുള്ള ഈസിജെറ്റ് വിമാനത്തിൽ യാത്രാക്കാർ തമ്മിൽ കൂട്ടത്തല്ല്. ലഘുഭക്ഷണം നിലത്ത് വീണതിനെ ചൊല്ലിയുണ്ടായ വാക്കുതർക്കമാണ് സംഘർഷത്തിലേക്ക് നയിച്ചത്. മോശം കാലാവസ്‌ഥ കാരണം വിമാനം രണ്ടു മണിക്കൂർ വൈകിയതിനെ തുടർന്ന് യാത്രക്കാർ അസ്വസ്‌ഥരായിരുന്നു. അപ്പോഴാണ് വിമാനത്തിൽ കൂട്ടത്തല്ലുണ്ടാകുന്നത്, ഇതു സംബന്ധിച്ച ദൃശ്യങ്ങൾ സമൂഹ മാധ്യമങ്ങളിൽ വൈറലായിരിക്കുകയാണ്. 

ഒരാൾ സഹയാത്രികനെ മർദിക്കുന്നതും മുഖത്തടിക്കുന്നതും വിഡിയോയിൽ കാണാം. പിന്നീട് അയാളുടെ നെഞ്ചിൽ ബലമായി തള്ളുകയും, ഇത് തടയാൻ ശ്രമിച്ച സുഹൃത്തുക്കളെ അയാൾ തട്ടിമാറ്റുന്നതും കാണാം. 

വിഷയം ഗുരുതരമായതിനെ തുടർന്ന്, വിമാനം പുറപ്പെടുന്നതിന് മുൻപ് പൊലിസ് എത്തി ഇരു യാത്രക്കാരെയും താക്കീത് ചെയ്തു എന്ന് ഈസിജെറ്റ് വക്താവ് വ്യക്തമാക്കി. ഒരു യാത്രക്കാരൻ ചിപ്‌സും മറ്റ് ലഘുഭക്ഷണങ്ങളും നിലത്തിട്ടതാണ് പ്രശ്‌നത്തിന്റെ തുടക്കം, ഇത് ചോദ്യം ചെയ്തതിന് മറ്റുള്ളവർ പരിഹസിക്കുകയും കൂടി ചെയ്തപ്പോൾ പ്രശ്നം സംഘർഷത്തിലേക്ക് എത്തിയെന്നും ദൃക്‌സാക്ഷികൾ പറയുന്നു.

പിന്നീട്, വിമാനത്തിലെ ജീവനക്കാർ ഉടൻ ഇടപെട്ട് സ്‌ഥലം ശാന്തമാക്കിയെന്നും യാത്രക്കാരുടെയും ജീവനക്കാരുടെയും സുരക്ഷ ഉറപ്പാക്കിയെന്നും ഈസിജെറ്റ് വ്യക്തമാക്കി. ഇത്തരം സംഭവങ്ങൾ അപൂർവമാണെങ്കിലും അവയെ ഗൗരവമായി കാണുന്നുവെന്നും ആരെയും അപമാനിക്കുന്നതോ ഭീഷണിപ്പെടുത്തുന്നതോ അനുവദിക്കില്ലെന്നും കമ്പനി അറിയിച്ചു.

A dramatic scene unfolded on a flight when a passenger's meal fell, triggering a heated argument among travelers, which was eventually diffused by the arrival of police.