2025 ഐപിഎല്ലിൽ കൊൽക്കത്ത നൈറ്റ് റൈഡേഴ്‌സ് ഇതുവരെ തങ്ങളുടെ പുതിയ ക്യാപ്റ്റനെ പ്രഖ്യാപിച്ചിട്ടില്ല. ഇപ്പോൾ കൊൽക്കത്ത ക്യാപ്റ്റനാക്കാൻ സാധ്യതയില്ലാത്ത ഒരു താരത്തെക്കുറിച്ച് സംസാരിക്കുകയാണ് മുൻ ഇന്ത്യൻ താരം ആകാശ് ചോപ്ര. അജിങ്ക്യ രഹാനയെകുറിച്ചാണ് ആകാശ് ചോപ്ര സംസാരിച്ചത്. 

'ലേലത്തിൽ കൊൽക്കത്ത അവസാനമാണ് അജിങ്ക്യ രഹാനെയെ വാങ്ങിയത്. അദ്ദേഹത്തിന്റെ ഫസ്റ്റ് ക്ലാസ് ക്രിക്കറ്റിലെ പ്രകടനങ്ങൾ വളരെ മികച്ചതായിരുന്നു, സയ്യിദ് മുഷ്താഖ് അലി ട്രോഫിയിലും അദ്ദേഹം വളരെ മികച്ച പ്രകടനം നടത്തി. അതുകൊണ്ട് അജിങ്ക്യ രഹാനെയെ കൊൽക്കത്തയുടെ ക്യാപ്റ്റനാക്കാൻ കഴിയുമെന്ന് തോന്നുന്നു. എന്നാൽ കൊൽക്കത്തയുടെ ക്യാപ്റ്റൻസി തീരുമാനങ്ങളിൽ അജിങ്ക്യ രഹാനെ ഉണ്ടാകുമെന്ന് ഞാൻ കരുതുന്നില്ല.രഹാനെ അവരുടെ ക്യാപ്റ്റനാവില്ല,' ആകാശ് ചോപ്ര തന്റെ യുട്യൂബ് ചാനലിലൂടെ പറഞ്ഞു.

മെഗാ ലേലത്തിൽ 1.50 കോടി രൂപയ്ക്കാണ് രഹാനെയെ കൊൽക്കത്ത സ്വന്തമാക്കിയത്. ഐപിഎല്ലിൽ മറ്റ് പല ടീമുകളെയും ക്യാപ്റ്റൻ എന്ന നിലയിൽ നയിക്കാൻ രഹാനെക്ക് സാധിച്ചിട്ടുണ്ട്. മാത്രമല്ല ഇന്ത്യൻ ടീമിന്റെ നായകനായും രഹാനെ പ്രവർത്തിച്ചിട്ടുണ്ട്. വെങ്കിടേഷ് അയ്യർ, റിങ്കു സിങ് എന്നിവരും കൊൽക്കത്തയുടെ ക്യാപ്റ്റൻ സ്ഥാനം ഏറ്റെടുക്കാൻ സാധ്യത കല്പിക്കപെടുന്നവരിൽ മുന്നിലുള്ള താരങ്ങളാണ്. കൊൽക്കത്ത ഇതിൽ ഏത് താരത്തെയാണ് പരിഗണിക്കുകയെന്നത് കണ്ടുതന്നെ അറിയണം. 

കഴിഞ്ഞ സീസണിൽ കൊൽക്കത്തയെ ചാമ്പ്യൻമാരാക്കിയ ശ്രേയസ് അയ്യരിനെ കൊൽക്കത്ത ടീമിൽ നിലനിർത്താതെ പോവുകയായിരുന്നു. ഐപിഎൽ മെഗാ ലേലത്തിൽ 26.5 കോടിക്ക് ശ്രേയസിനെ പഞ്ചാബ് കിങ്‌സ് ആണ് അയ്യരെ സ്വന്തമാക്കിയിരുന്നത്. ഐപിഎൽ ചരിത്രത്തിൽ ലേലത്തിൽ ഒരു താരത്തിന് ലഭിക്കുന്ന ഏറ്റവും ഉയർന്ന രണ്ടാമത്തെ തുക കൂടിയാണിത്.