ഷാർജ: പഴയകാല കാറുകളുടെ അമൂല്യ ശേഖരവുമായി ഷാർജ ക്ലാസിക് കാർ മേളയ്ക്കു തുടക്കമായി. ക്ലാസിക് കാർ മേളയുടെ ആകർഷണം വിന്റേജ് കാറുകളുടെ അമൂല്യ ശേഖരമാണ്. 'കഥയുടെ തുടക്കം' എന്ന പ്രമേയത്തിൽ ഷാർജ ഓൾഡ് കാർസ് ക്ലബിലാണ് കാർ മേള സംഘടിപ്പിച്ചിരിക്കുന്നത്.

അതേസമയം, മേളയിൽ ചരിത്രവും വിനോദവും അറിവും സമ്മേളിക്കുന്നു. ഷെയ്‌ഖ് സായിദ് ബിൻ സുൽത്താൻ അൽ നഹ്യാൻ്റെ 1988 മോഡൽ രണ്ട് ഡോർ റേഞ്ച് റോവർ ക്ലാസിക്കും, ഷെയ്ഖ് ഖലീഫ ബിൻ സായിദ് അൽ നഹ്യാൻ ഉപയോഗിച്ചിരുന്ന 1988 മോഡൽ നാലു ഡോർ റേഞ്ച് റോവറും പ്രദർശനത്തിലെ പ്രധാന ആകർഷണങ്ങളാണ്. 400 വിൻ്റേജ് വാഹനങ്ങളാണ് മേളയിലുള്ളത്.

ക്ലാസിക് കാറുകളുടെ ശേഖരണം കേവലമൊരു വിനോദം മാത്രമല്ല വൻ വരുമാനം ഉറപ്പാക്കുന്ന നിക്ഷേപ മേഖല കൂടിയാണ്. ക്ലാസിക് കാറുകളുടെ വിൽപനയിലും വാങ്ങലിലും വൻ തുകയാണ് ഒഴുകുന്നത് എന്നാൽ, ചില വാഹനങ്ങൾക്കു മേൽ എത്ര വിലയിട്ടാലും ലഭിക്കില്ലെന്നതും വിപണിയിലെ മറ്റൊരു പ്രത്യേകതയാണ്.

ക്ലാസിക് കാറുകളുടെ ശേഖരണം അഭിനിവേശമോ അതോ വ്യവസായമോ? കാറുകൾ ശേഖരിക്കുന്നതിലെ കല എന്ന വിഷയത്തിൽ ഒരു പാനൽ ചർച്ച സംഘടിപ്പിച്ചിരുന്നു. കാർ മേഖലയിലെ വിദഗ്‌ധർ ചർച്ചയിൽ പങ്കെടുത്തു. ക്ലാസിക് കാറുകളുടേത് ലാഭകരമായ വിപണിയാണ്. പണമുണ്ട് എന്നതുകൊണ്ട് മാത്രം ഒരു ക്ലാസിക് കാറിന്റെ ഉടമസ്ഥാനാകാൻ കഴിയില്ലെന്നും, കാറുകളുടെ കൃത്യമായ മൂല്യനിർണയമാണ് മികച്ച നിക്ഷേപത്തിനു കളമൊരുക്കുന്നതെന്നും പാനൽ ചർച്ച അഭിപ്രായപ്പെട്ടു.

സംസ്കാരത്തെയും പൈതൃകത്തെയും ഉയർത്തിപ്പിടിക്കൽ കൂടിയാണ് ക്ലാസിക് കാറുകളുടെ ശേഖരത്തിലൂടെ ചെയ്യുന്നത്. ക്ലാസിക് കാറുകൾ മോഡിഫെെ ചെയ്യുക എന്നത് നല്ല ഭാവനയുള്ളവർക്കും നൈപുണ്യമുള്ളവർക്കും പറഞ്ഞിട്ടുള്ള ജോലിയാണ്. ക്ലാസിക് കാറുകളുടെ തനതു മൂല്യം നിലനിർത്തുന്നതിന് ചില മോഡിഫിക്കേഷനുകൾ അത്യാവശ്യമാണെന്നും ചർച്ച വിലയിരുത്തി. ക്ലാസിക് കാറുകളുടേത് ഗൃഹാതുര മൂല്യമാണെന്നും, രാജ്യാന്തര വിപണിയിൽ ഇതിന് മൂല്യമേറെയാണെന്നും വിദഗ്ധർ പറഞ്ഞു. അപൂർവ മോഡലുകൾക്കായി എത്ര പണം മുടക്കാനും അമേരിക്ക, ജപ്പാൻ എന്നിങ്ങനെയുള്ള രാജ്യങ്ങളിലെ ക്ലാസിക് കാർ ഉടമകൾക്കു മടിയില്ല. ഫെബ്രുവരി 17നാണ് കാർ മേള സമാപിക്കുന്നത്. വൈകുന്നേരം 4 മുതൽ രാത്രി 10 വരെയാണ് മേളയിലേക്കുള്ള പ്രവേശനസമയം. 

The Sharjah Classic Car Show has caught everyone's attention with its incredible display of vintage cars, showcasing a priceless collection of classic automobiles.