റിയാദ്: സഊദി പ്രോ ലീഗിലെ ഈ സീസണിലെ ഗോൾഡൻ ബൂട്ട് സ്വന്തമാക്കാൻ സൂപ്പർതാരങ്ങളായ ക്രിസ്റ്റ്യാനോ റൊണാൾഡോയും കരിം ബെൻസിമയും തമ്മിൽ വാശിയേറിയ പോരാട്ടം ആണ് നടന്നുകൊണ്ടിരിക്കുന്നത്. ഇതിനോടകം തന്നെ റൊണാൾഡോ ലീഗിൽ 16 ഗോളുകളും ബെൻസിമ 15 ഗോളുകൾക്കാണ് നേടിയിട്ടുള്ളത്. ഇപ്പോൾ റൊണാൾഡോക്കൊപ്പം ഗോൾഡൻ ബൂട്ട് സ്വന്തമാക്കാനുള്ള മത്സരത്തെക്കുറിച്ച് സംസാരിക്കുകയാണ് ബെൻസിമ. 

'എനിക്ക് ഒരു കാര്യം പറയാനുണ്ട്. മത്സരങ്ങളിൽ ഗോളുകൾ നേടാൻ മാത്രം ചിന്തിക്കുന്ന ആളല്ല ഞാൻ. ഗോൾഡൻ ബൂട്ട് റേസിൽ റൊണാൾഡോക്കൊപ്പം ഞാനുള്ളത് മികച്ച കാര്യമാണ്. പക്ഷേ എനിക്ക്, ഏറ്റവും പ്രധാനപ്പെട്ട കാര്യം എന്തെന്നാൽ മത്സരങ്ങൾ വിജയിക്കുക എന്നതാണ്. അതിന് വേണ്ടി എന്റെ ടീമിനായി ഗോളുകൾ നേടാൻ സാധിക്കുന്നുണ്ടെങ്കിൽ ഞാൻ സന്തോഷവാനാണ്. എനിക്ക് ഫുട്ബോൾ വളരെ ഇഷ്ടമാണ്. ഗോളുകൾ നേടാനും അതിലൂടെ എന്റെ ടീമിനെ വിജയത്തിൽ എത്തിക്കാനും ഞാൻ ആഗ്രഹിക്കുന്നുണ്ട്. എനിക്ക് ടീം ആണ് കൂടുതൽ പ്രധാനം. അതുകൊണ്ട് ഞാൻ സന്തോഷവാനാണ്,' കരിം ബെൻസിമ പറഞ്ഞു. 

നിലവിൽ സഊദി പ്രോ ലീഗിൽ ഒന്നാം സ്ഥാനത്താണ് അൽ ഇത്തിഹാദ്. 20 മത്സരങ്ങളിൽ നിന്നും 17 വിജയവും ഒരു സമനിലയും രണ്ട് തോൽവിയും അടക്കം 52 പോയിന്റാണ് ബെൻസിമക്കും സംഘത്തിനും ഉള്ളത്. 48 പോയിന്റുമായി നിലവിലെ ചാമ്പ്യന്മാരായ അൽ ഹിലാൽ ആണ് രണ്ടാം സ്ഥാനത്തുള്ളത്.

ലീഗിൽ ഫെബ്രുവരി 22ന് അൽ ഹിലാലിനെതിരെയാണ് അൽ ഇത്തിഹാദിന്റെ അടുത്ത മത്സരം. കിംഗ് അബ്ദുള്ള സ്പോർട്സ് സിറ്റി സ്റ്റേഡിയത്തിൽ നടക്കുന്ന മത്സരത്തിൽ ബെൻസിമയുടെ ബൂട്ടുകളിൽ നിന്നും ഇനിയും ഗോളുകൾ പിറക്കുമെന്നുതന്നെയാണ് പ്രതീക്ഷിക്കുന്നത്. അതേസമയം റൊണാൾഡോയുടെ അൽ നസർ നിലവിൽ ലീഗിൽ മൂന്നാം സ്ഥാനത്തുമാണ് ഉള്ളത്. 20 മത്സരങ്ങളിൽ നിന്നും 13 വിജയവും 5 സമനിലയും രണ്ട് തോൽവിയും അടക്കം 44 പോയിന്റാണ് റൊണാൾഡോയുടെയും കൂട്ടരുടെയും കൈവശമുള്ളത്.