ഡൽഹി: ഓപ്പറേഷൻ സിന്ദൂറിന് പിന്നാലെ പാകിസ്ഥാൻ നടത്തിയ വെടിവയ്പിൽ ജമ്മു കശ്മീരിലെ പൂഞ്ച് സെക്ടറിൽ 15 പേർ കൊല്ലപ്പെട്ടു. മരിച്ചവരിൽ എല്ലാവരും കശ്മീരികൾ തന്നെയാണ്. ആക്രമണത്തിൽ 43 പേർക്ക് പരിക്കേറ്റതായും റിപ്പോർട്ടുകളുണ്ട്. പരിക്കേറ്റവരെ വിവിധ ആശുപത്രികളിൽ പ്രവേശിപ്പിച്ച് ചികിത്സ നൽകുന്നു.

പൂഞ്ച് അതിർത്തിയിൽ മലമുകളിൽ നിലയുറപ്പിച്ച പാക് സൈനികരാണ് വെടിവയ്പ് നടത്തിയതെന്ന് സ്ഥിരീകരിച്ചു. താമസവീടുകളടക്കം ലക്ഷ്യമിട്ടുള്ള ആക്രമണത്തിൽ നിരവധി നാട്ടുകാരെ നേരിട്ട് ബാധിച്ചു.ഇതിനെ തുടർന്ന് ഇന്ത്യൻ സൈന്യം ശക്തമായ തിരിച്ചടിയിൽ  മൂന്ന് പാക് സൈനികർ കൊല്ലപ്പെട്ടു.

പാക് അധീന കശ്മീരിലെ ഭവൽപൂർ, മുറിട്കേ, സിലാൽകോട്ട്, കോട്ലി, ഭിംബീർ, ടെഹ്റകലാൻ, മുസഫറബാദ് ഉൾപ്പെടെയുള്ള ഒൻപത് ഭീകര കേന്ദ്രങ്ങൾ ഇന്ത്യൻ സൈന്യം തകർത്തു. ആക്രമണത്തിൽ ജെയ്ഷെ മുഹമ്മദ് സ്ഥാപകൻ മസൂദ് അസറിന്റെ കുടുംബത്തിലെ 14 പേരടക്കം 32 പേർ കൊല്ലപ്പെട്ടതായാണ് പാകിസ്ഥാനിലെ ചില മാധ്യമങ്ങൾ റിപ്പോർട്ട് ചെയ്തത്. എട്ടുപേർ മരിച്ചതായി പാക് സൈനിക വക്താക്കൾ പറഞ്ഞു. എന്നാല്‍ ഇന്ത്യയുടെ കണക്കുകള്‍ പ്രകാരം കൊല്ലപ്പെട്ടവരുടെ എണ്ണം 90ൽ അധികമെന്നാണ്.

ഇന്ത്യൻ പ്രധാനമന്ത്രി നരേന്ദ്രമോദി മുഴുവൻ രാത്രി ആക്രമണത്തിന്റെ പുരോഗതി നേരിട്ട് നിരീക്ഷിച്ചു. പ്രതീക്ഷിക്കാവുന്ന പാകിസ്ഥാൻ തിരിച്ചടിയെ മുൻനിർത്തി, അതിർത്തിക്ക്  സമീപമുള്ള 10 ഇന്ത്യൻ വിമാനത്താവളങ്ങൾ താൽക്കാലികമായി അടച്ചു. ഇന്ത്യ യാതൊരു പാക് സൈനിക താവളത്തെയും ലക്ഷ്യമാക്കിയിട്ടില്ലെന്നും തകർത്തത് ഭീകര കേന്ദ്രങ്ങളാണെന്നും വിദേശകാര്യ സെക്രട്ടറി വിക്രം മിസ്രി വ്യക്തമാക്കി.

പാകിസ്ഥാൻ കടുത്ത പ്രത്യാക്രമണത്തിന് തയ്യാറെടുക്കുന്നു. പാക് സൈന്യത്തിന് തിരിച്ചടിയ്ക്കാനുള്ള നിർദേശം സർക്കാർ നൽകി. റെഡ് അലർട്ട് പ്രഖ്യാപിച്ച പാകിസ്ഥാൻ, ഇന്ത്യൻ ആക്രമണത്തെക്കുറിച്ച് മാധ്യമങ്ങളിലൂടെ ശക്തമായ പ്രസ്താവനകളാണ് നടത്തുന്നത്. പാകിസ്ഥാൻ പ്രത്യാക്രമണത്തിന് മുതിർന്നാൽ ശക്തമായ തിരിച്ചടിയുണ്ടാകുമെന്ന് വാർത്താ സമ്മേളനത്തിൽ കേണൽ സോഫിയ ഖുറേഷി, വിങ് കമ്മാൻഡർ വ്യോമിക സിങും വാർത്താ സമ്മേളനത്തിൽ പാകിസ്ഥാന് മുന്നറിയിപ്പ് നൽകി