ന്യൂഡൽഹി: പഹൽഗാമിൽ 26 നിരപരാധികളെ കൊലപ്പെടുത്തിയ ഭീകരാക്രമണത്തിന് ഇന്ത്യൻ സായുധ സേന നൽകിയ ശക്തമായ തിരിച്ചടിയാണ് ‘ഓപ്പറേഷൻ സിന്ദൂർ’. പ്രധാനമന്ത്രി നരേന്ദ്ര മോദി പേര് നൽകിയ ഈ സർജിക്കൽ സ്‌ട്രൈക്ക്, ഭീകരവാദത്തിനെതിരായ രാജ്യത്തിന്റെ നിലപാടിന്റെ പ്രതീകമായി മാറി. പാകിസ്താനിലും പാക് അധിനിവേശ ജമ്മു-കശ്മീരിലുമായി 9 ഭീകര ക്യാമ്പുകൾ ഇന്ത്യൻ സൈന്യം തകർത്തു.

ഇന്നലെ അർദ്ധരാത്രി മുതൽ ആരംഭിച്ച  കൃത്യനിർവഹണ ദൗത്യം രാജ്യത്തെ ഞെട്ടലിൽ നിന്ന് ഐക്യത്തിന്റെയും അഭിമാനത്തിന്റെയും നിമിഷങ്ങളിലേക്ക് നയിച്ചു. എത്ര ഭീകരരെ വധിച്ചു എന്നതിന്റെ ഔദ്യോഗിക കണക്കുകൾ പുറത്തുവന്നിട്ടില്ലെങ്കിലും, ദൗത്യത്തിന്റെ വിജയത്തിൽ രാജ്യം പൂർണ തൃപ്തിയിലാണ്. 

സിന്ദൂരത്തിന്റെ വൈകാരിക പ്രതീകാത്മകത

പഹൽഗാം ആക്രമണത്തിൽ 25 സ്ത്രീകളുടെ സിന്ദൂരം ഭീകരർ തുടച്ചുമാറ്റി. ഇന്ത്യയുടെ ‘സ്വിറ്റ്സർലൻഡ്’ എന്നറിയപ്പെടുന്ന പഹൽഗാമിൽ മധുവിധു ആഘോഷിക്കാനെത്തിയ ഒരു നവവധുവിന്റെ സിന്ദൂരവും ഇതിൽ ഉൾപ്പെടുന്നു. വിവാഹിതയായ ഒരു ഹിന്ദു സ്ത്രീ നെറ്റിയിൽ ചാർത്തുന്ന സിന്ദൂരം, ഭർത്താവിന്റെ മരണത്തോടെ മായ്ക്കപ്പെടുന്നു. മതം ചോദിച്ച് പുരുഷന്മാരെ മാത്രം തെരഞ്ഞെടുത്ത് കൊലപ്പെടുത്തിയ ഭീകരർക്ക്, അവരുടെ ഭാര്യമാരുടെ സിന്ദൂരം തുടച്ചുമാറ്റിയ ക്രൂരതയ്ക്ക്, ഇന്ത്യ ഈ ഓപ്പറേഷനിലൂടെ ചുട്ട മറുപടി നൽകി.

ഓപ്പറേഷൻ സിന്ദൂറിന്റെ ലോഗോയിൽ ‘സിന്ദൂർ’ എന്ന വാക്കിലെ ‘ഒ’ അക്ഷരം സിന്ദൂരച്ചെപ്പിന്റെ ആകൃതിയിൽ രൂപകൽപ്പന ചെയ്തിരിക്കുന്നു. അതിനു താഴെ സിന്ദൂരം പടർന്നു കിടക്കുന്നതിന്റെ ചിത്രീകരണവും ഉൾപ്പെടുത്തിയിട്ടുണ്ട്. ഈ രൂപകൽപ്പന തന്നെ ദൗത്യത്തിന്റെ വൈകാരികവും സാംസ്കാരികവുമായ പ്രാധാന്യം വ്യക്തമാക്കുന്നു.

കണ്ണീരിന്റെ കഥകൾ

ആക്രമണത്തിൽ ജീവൻ നഷ്ടപ്പെട്ടവരുടെ കുടുംബങ്ങളുടെ ദുഃഖം രാജ്യത്തെ ഒന്നടങ്കം കണ്ണീർ കടലിലാഴ്ത്തി. നാവിക സേനാ ഉദ്യോഗസ്ഥനായ ലെഫ്റ്റനന്റ് വിനയ് നർവാളിന്റെ മൃതദേഹത്തിനരികിൽ കൈകളിൽ ചൂഡ ധരിച്ച് വിതുമ്പുന്ന നവവധു ഹിമാൻഷി നർവാൾ, ഭർത്താവിന് വെടിയേറ്റപ്പോൾ നിസ്സഹായയായി സഹായം അഭ്യർത്ഥിച്ച മഞ്ജുനാഥ് റാവുവിന്റെ ഭാര്യ പല്ലവി, ശൈലേഷ് കലാത്തിയയുടെ ഭാര്യ ശീതൾ, ബിതാൻ അധികാരിയുടെ ഭാര്യ സോഹിനി, ശുഭം ദ്വിവേദിയുടെ ഭാര്യ ഐശന്യ, സന്തോഷ് ജഗ്ദലെയുടെ ഭാര്യ പ്രഗതി ജഗ്ദലെ തുടങ്ങി, ഓരോ സ്ത്രീയുടെയും കണ്ണുനീർ രാജ്യത്തിന്റെ ഹൃദയത്തെ തകർത്തു.

പഹൽഗാം ആക്രമണത്തിന് ശക്തമായ തിരിച്ചടി നൽകാൻ സൈന്യത്തിന് പൂർണ സ്വാതന്ത്ര്യം നൽകിയതായി പ്രധാനമന്ത്രി നരേന്ദ്ര മോദി നേരത്തെ പ്രഖ്യാപിച്ചിരുന്നു. പാകിസ്താൻ സൈനിക കേന്ദ്രങ്ങളെ ഒഴിവാക്കി, ഭീകര ക്യാമ്പുകളെ മാത്രം ലക്ഷ്യമിട്ട് നടത്തിയ ഈ ‘പ്രിസിഷൻ സ്‌ട്രൈക്ക്’ സൂക്ഷ്മമായി നിരീക്ഷിച്ചത് പ്രധാനമന്ത്രിയാണ്.

ഓപ്പറേഷൻ സിന്ദൂറിന്റെ ബ്രീഫിങ് നടത്തിയത് വനിതാ സൈനിക മേധാവികളാണ് എന്നത് രാജ്യത്തിന്റെ ‘സ്ത്രീ ശക്തി’യുടെ പ്രതിഫലനമാണ്. ഇന്ത്യൻ സ്ത്രീകളെ ഭയപ്പെടുത്താൻ ശ്രമിച്ച ഭീകരർക്ക് ഇതിലും ശക്തമായ മറുപടി നൽകാൻ കഴിയില്ലെന്നാണ് സൈന്യം വ്യക്തമാക്കുന്നത്. ഓപ്പറേഷൻ സിന്ദൂർ, ഭീകരവാദത്തോട് യാതൊരു വിട്ടുവീഴ്ചയും ഇല്ലാത്ത ഒരു പുതിയ ഭാരതത്തിന്റെ പ്രഖ്യാപനമാണ്. രാജ്യം ഒന്നടങ്കം ഈ ദൗത്യത്തിന്റെ വിജയത്തിൽ അഭിമാനിക്കുന്നു.