തിരുവനന്തപുരം :ഘടകക്ഷികളുടെ എതിര്‍പ്പുകള്‍ മറികടന്ന് കിഫ്ബി ടോള്‍ ഉറപ്പിച്ച് എല്‍.ഡി.എഫ്. കിഫ്ബിയുടെ സംരക്ഷണം ഉറപ്പാക്കണമെന്ന് സര്‍ക്കാരിനോട് എല്‍.ഡി.എഫ് ആവശ്യപ്പെട്ടു. സി.പി.ഐ ഉള്‍പ്പെടെയുള്ള ഘടകകക്ഷികള്‍ ഉന്നയിച്ച എതിരഭിപ്രായം തള്ളിയാണ് എല്‍.ഡി.എഫ് കണ്‍വീനര്‍ ടി.പി.രാമകൃഷ്ണന്‍ സര്‍ക്കുലര്‍ പുറത്തിറക്കിയത്. കിഫ്ബിയെ സംരക്ഷിക്കാന്‍ സര്‍ക്കാര്‍ എല്ലാ നടപടികളും സ്വീകരിക്കണമെന്നും നിര്‍ദ്ദേശിച്ചിട്ടുണ്ട്. 

ജനങ്ങള്‍ക്ക് ദോഷം ഉണ്ടാകാത്ത രീതിയില്‍ കിഫ്ബി പദ്ധതികളില്‍ നിന്ന് വരുമാനം ഉണ്ടാക്കണം. വന്‍കിട പദ്ധതികള്‍ വഴി പണം കണ്ടെത്തണമെന്നുമാണ് നിര്‍ദ്ദേശം. മദ്യപ്ലാന്റ് ആരംഭിക്കുമ്പോള്‍ കുടിവെള്ളത്തേയും കൃഷിയേയും ബാധിക്കരുതെന്നും എല്‍.ഡി.എഫ് വ്യക്തമാക്കി. 

സര്‍ക്കാര്‍ അന്തിമ തീരുമാനമെടുത്തിട്ടില്ലെന്നായിരുന്നു ഇടത് മുന്നണിയോഗ ശേഷം കണ്‍വീനറുടെ വിശദീകരണം. ചോദ്യം ഉയര്‍ന്നപ്പോഴാണ് എല്‍.ഡി.എഫ് കണ്‍വീനര്‍ ഇക്കാര്യം വ്യക്തമാക്കിയത്. 

കിഫ്ബി റോഡുകള്‍ക്ക് ടോള്‍ പിരിക്കുന്നത് നേരത്തെയും മുഖ്യമന്ത്രി സ്ഥിരീകരിച്ചിരുന്നു. യൂസര്‍ഫീ വഴി ലഭിക്കുന്ന പണം ഉപയോഗിച്ച് കിഫ്ബിയുടെ വായ്പകള്‍ തിരിച്ചടക്കാമെന്നും ഇതുവഴി വായ്പ സംബന്ധിച്ച് കേന്ദ്രത്തിന്റെ തടസവാദങ്ങള്‍ മറികടക്കാമെന്നും മുഖ്യമന്ത്രി നിയമസഭയിലാണ് വ്യക്തമാക്കിയത്. കിഫ്ബി റോഡുകള്‍ക്ക് ടോള്‍ ഏര്‍പ്പെടുത്തുതുമായി ബന്ധപ്പെട്ട് പ്രതിപക്ഷ നേതാവ് ഉയര്‍ത്തിയ ആരോപണങ്ങള്‍ക്ക് മറുപടി പറയവെയാണ് യൂസര്‍ഫീ ഈടാക്കുന്ന കാര്യം മുഖ്യമന്ത്രി സ്ഥിരീകരിച്ചത്.