അബൂദബി: റമദാന് മുന്നോടിയായി 300 ടൺ ഭക്ഷ്യവസ്തുക്കൾ ഗസ്സയിൽ എത്തിക്കാൻ യുഎഇ. ഇതിന്റെ ഭാ​ഗമായി ഫുജൈറയിൽ നിന്ന് 100 ടൺ ഭക്ഷ്യോൽപന്നങ്ങൾ ഈജിപ്തിലെ അൽ അരീഷ് വിമാനത്താവളത്തിൽ എത്തിച്ചു.

പിന്നീട് റോഡ് മാർഗം ​ഗസ്സയിൽ എത്തിച്ച് ഇത് വിതരണം ചെയ്യും. വ്രതാനുഷ്‌ഠാനത്തിന് ആവശ്യമായ സാധനങ്ങൾ പ്രതിസന്ധി ഘട്ടങ്ങളിലും ലഭ്യമാക്കുകയാണ് ഇതിലൂടെ ലക്ഷ്യമിടുന്നത്. അരി, ധാന്യപ്പൊടി, പാചക എണ്ണ, പഞ്ചസാര തുടങ്ങിയ അവശ്യ സാധനങ്ങളാണ് ​ഗസ്സയിൽ എത്തിക്കുന്നത്.

ശേഷിക്കുന്ന 200 ടൺ വസ്‌തുക്കൾ ഇന്നലെയും ഇന്നുമായി റാസൽഖൈമയിൽനിന്ന് പുറപ്പെടുന്ന വിമാനത്തിൽ അയക്കും. വ്രതാരംഭത്തിന് മുന്നോടിയായി ദുരിതബാധിത മേഖലകളിൽ അവശ്യസാധനങ്ങളുടെ വിതരണം പൂർത്തിയാക്കുമെന്ന് അധികൃതർ അറിയിച്ചു.

യുദ്ധത്താൽ ദുരിതമനുഭവിക്കുന്ന ഫലസ്‌തീൻ ജനതക്ക് ആശ്വാസമെത്തിക്കാനുള്ള ഗാലന്റ് നൈറ്റ് 3 കാരുണ്യ പദ്ധതി പ്രകാരമാണ് ആവശ്യ വസ്തുക്കൾ ​എത്തിക്കുന്നത്. ഇതുവരെ 55,000 ടൺ ദുരിതാശ്വാസ വസ്‌തുക്കളാണ് യുഎഇ പ്രസിഡൻ്റ് ഷെയ്‌ഖ് മുഹമ്മദ് ബിൻ സായിദ് അൽ നഹ്യാൻ്റെ നിർദേശപ്രകാരം ആരംഭിച്ച ഗാലന്റ് നൈറ്റ്-3 കാരുണ്യ പദ്ധതി പ്രകാരം ​എത്തിച്ചത്.

The UAE is once again extending a helping hand to Gaza, this time with a 300-ton shipment of food supplies, including staple goods like flour and rice