ന്യൂഡല്‍ഹി: അമിതവണ്ണത്തിനെതിരായ പ്രചാരണത്തിനായി നടന്‍ മോഹന്‍ലാലിനെയടക്കം 10 പേരെ നാമനിര്‍ദ്ദേശം ചെയ്ത് പ്രധാനമന്ത്രി നരേന്ദ്രമോദി. വിവിധ മേഖലകളില്‍ പ്രമുഖരായ 10 പേരെയാണ് പ്രധാനമന്ത്രി നാമനിര്‍ദ്ദേശം ചെയ്തത്. 

ജമ്മു കശ്മീര്‍ മുഖ്യമന്ത്രി ഒമര്‍ അബ്ദുള്ള, വ്യവസായി ആനന്ദ് മഹീന്ദ്ര, നടന്‍ ആര്‍. മാധവന്‍, ഭോജ്പുരി ഗായിക നിരാഹ്വ, ഒളിമ്പിക്സ് മെഡല്‍ ജേതാക്കളായ മനു ഭാക്കര്‍, മീരാഭായി ചാനു, ഇന്‍ഫോസിസ് സഹസ്ഥാപകന്‍ നന്ദന്‍ നീലേക്കനി, ഗായിക ശ്രേയാ ഘോഷാല്‍, രാജ്യസഭാംഗം സുധാ മൂര്‍ത്തി എന്നിവവരെയാണ് ഈ മാതൃകാ പദ്ധതിയിലേക്ക് നാമനിര്‍ദ്ദേശം ചെയ്തത്. സമൂഹമാധ്യമമായ എക്‌സിലൂടെയാണ് മോദി ഇക്കാര്യം പങ്കുവെച്ചത്. ഇവരോട് മറ്റു പത്തുപേരെ നാമനിര്‍ദ്ദേശം ചെയ്യാന്‍ പ്രധാനമന്ത്രി ആവശ്യപ്പെട്ടു.  

ഭക്ഷണത്തില്‍ എണ്ണയുടെ അളവ് കുറയ്ക്കണമെന്ന് ഞായറാഴ്ച തന്റെ മന്‍ കി ബാത്ത് പ്രസംഗത്തില്‍ പ്രധാനമന്ത്രി ആഹ്വാനം ചെയ്തിരുന്നു. ഇതിന്റെ ആദ്യഘട്ടമായാണ് പത്തുപേരെ മോദി നാമനിര്‍ദ്ദേശം ചെയ്തത്.  എണ്ണയുടെ ഉപയോഗം കുറയ്‌ക്കേണ്ടതിന്റെ ആവശ്യകതയെക്കുറിച്ച് ജനങ്ങളെ ബോധവല്‍ക്കരിക്കുകയും അമിതവണ്ണത്തിനെതിരായ പോരാട്ടം ശക്തിപ്പെടുത്തുകയും ചെയ്യുക എന്നതാണ് ഈ നീക്കത്തിന്റെ ലക്ഷ്യം.

അതേസമയം, പ്രധാനമന്ത്രിയുടെ നടപടിയെ ജമ്മുകശ്മിര്‍ മുഖ്യമന്ത്രി ഒമര്‍ അബ്ദുള്ള സ്വാഗതം ചെയ്തു. പ്രചാരണത്തില്‍ പങ്കുചേരാന്‍ കഴിഞ്ഞതില്‍ സന്തോഷമുണ്ടെന്നും പ്രചാരണത്തിലേക്ക് മറ്റു പത്തു പേരെ താന്‍ നാമനിര്‍ദ്ദേശം ചെയ്യുന്നതായും അദ്ദേഹം എക്‌സില്‍ കുറിച്ചു. 

'പ്രധാനമന്ത്രി ആരംഭിച്ച പൊണ്ണത്തടിക്കെതിരായ പ്രചാരണത്തില്‍ പങ്കുചേരാന്‍ കഴിഞ്ഞതില്‍ എനിക്ക് വളരെ സന്തോഷമുണ്ട്. ഹൃദ്രോഗം, ടൈപ്പ് 2 പ്രമേഹം, പക്ഷാഘാതം, ശ്വസന പ്രശ്‌നങ്ങള്‍ തുടങ്ങിയ ജീവിതശൈലിയുമായി ബന്ധപ്പെട്ട നിരവധി ആരോഗ്യ പ്രശ്‌നങ്ങള്‍ക്ക് അമിതവണ്ണം കാരണമാകുന്നു, ഉത്കണ്ഠ, വിഷാദം തുടങ്ങിയ മാനസികാരോഗ്യ അവസ്ഥകളും അതില്‍പെടും.  പ്രധാനമന്ത്രിയുടെ പൊണ്ണത്തടിക്കെതിരായ പ്രചാരണത്തില്‍ പങ്കുചേരാന്‍ ഈ 10 പേരെ ഇന്ന് ഞാന്‍ നാമനിര്‍ദ്ദേശം ചെയ്യുന്നു, ഈ പോരാട്ടം മുന്നോട്ട് കൊണ്ടുപോകാന്‍ 10 പേരെ വീതം നാമനിര്‍ദ്ദേശം ചെയ്യാന്‍ അവരോട് അഭ്യര്‍ത്ഥിക്കുന്നു,'- ഒമര്‍ അബ്ദുള്ള എക്‌സില്‍ കുറിച്ചു.