അഹമ്മാദാബാദ്: ഇത്തിഹാദ് എയര്‍വേഴ്‌സുമായുള്ള കോഡ്‌ഷെയര്‍ പങ്കാളിത്തത്തിന്റെ ഭാഗമായി ബെംഗളൂരു, അഹമ്മാദാബാദ് എന്നീ നഗരങ്ങളില്‍ നിന്നും അബൂദബിയിലേക്ക് സര്‍വീസ് ആരംഭിക്കാന്‍ ആകാശ എയര്‍. ഇന്ത്യയ്ക്കും യുഎഇയ്ക്കും ഇടയില്‍ അതിവേഗം വളരുന്ന വ്യോമയാന ഇടനാഴിയില്‍ കമ്പനിയുടെ സ്ഥാനം കൂടുതല്‍ ശക്തിപ്പെടുത്തുന്നതിനും കണക്റ്റിവിറ്റി വര്‍ധിപ്പിക്കുന്നതിനും പുതിയ റൂട്ടുകള്‍ സഹായിക്കും.

ബെംഗളൂരു അബൂദബി ഉദ്ഘാടന വിമാനം മാര്‍ച്ച് 1 ശനിയാഴ്ച ഇന്ത്യന്‍ സമയം രാവിലെ 10:00 ന് കെമ്പെഗൗഡ അന്താരാഷ്ട്ര വിമാനത്താവളത്തില്‍ നിന്ന് പുറപ്പെട്ട് ഇന്ത്യന്‍ സമയം ഉച്ചയ്ക്ക് 12:35 ന് അബൂദബിയിലെ സായിദ് അന്താരാഷ്ട്ര വിമാനത്താവളത്തില്‍ എത്തിയിരുന്നു. അതേസമയം, അഹമ്മദാബാദ് അബൂദബി വിമാനം മാര്‍ച്ച് 1 ന് രാത്രി 10:45 ന് സര്‍ദാര്‍ വല്ലഭായ് പട്ടേല്‍ അന്താരാഷ്ട്ര വിമാനത്താവളത്തില്‍ നിന്ന് പുറപ്പെട്ട് മാര്‍ച്ച് 2 ഞായറാഴ്ച യുഎഇ സമയം പുലര്‍ച്ചെ 1:00 ന് അബൂദബിയില്‍ എത്തിച്ചേരും.

2024 ജൂലൈയില്‍ ആരംഭിച്ച ആകാശയുടെ നിലവിലുള്ള പ്രതിദിന മുംബൈ-അബൂദബി വിമാന സര്‍വീസുകള്‍ക്ക് വലിയ ഡിമാന്‍ഡ് ഉണ്ട്. ഈ കൂട്ടിച്ചേര്‍ക്കലുകളോടെ, അബൂദബിയെ മൂന്ന് പ്രധാന ഇന്ത്യന്‍ നഗരങ്ങളുമായി ബന്ധിപ്പിക്കുന്ന 21 പ്രതിവാര വിമാന സര്‍വീസുകളാകും എയര്‍ലൈന്‍ നടത്തുക. നിലവില്‍ 27 വിമാനങ്ങളുള്ള എയര്‍ലൈനിന്റെ ഫ്‌ലീറ്റിന്റെ 17 ശതമാനം അന്താരാഷ്ട്ര റൂട്ടുകള്‍ക്കായി നീക്കിവയ്ക്കുമെന്ന് അധികൃതര്‍ പറഞ്ഞു.

കൂടാതെ, ഏപ്രില്‍ 4 മുതല്‍ ഹൈദരാബാദിനെയും ഡല്‍ഹിയെയും ബീഹാറിലെ ദര്‍ഭംഗയുമായി ബന്ധിപ്പിക്കുന്ന പുതിയ ആഭ്യന്തര റൂട്ടുകള്‍ ആരംഭിക്കുമെന്ന് ആകാശ എയര്‍ അടുത്തിടെ പ്രഖ്യാപിച്ചിരുന്നു.

Akasha Air to launch two new flights to Abu Dhabi