റിയാദ്: വിനോദയാത്ര കഴിഞ്ഞു മടങ്ങിവരുന്നതിനിടെ പാസ്പോർട്ട് കാണാതായതിനെ തുടർന്ന് ഇന്ത്യക്കാരനായ യുവാവ് രണ്ടു ദിവസം റിയാദ് വിമാനത്താവളത്തിൽ കുടുങ്ങി. ഉത്തർപ്രദേശ് ജോൺപുർ സ്വദേശി ഫഹീം അഖ് തർ അൻസാരിയാണ് അസർബൈജാൻ സന്ദർശനം കഴിഞ്ഞ് മടങ്ങിവരുന്നതിനിടെ പാസ്പോർട്ട് കാണാതായി രണ്ട് ദിവസം എയർപോർട്ടിൽ കുടുങ്ങിയത്. ഇദ്ദേഹത്തെ അസർബൈജാനിലേക്ക് തന്നെ തിരിച്ചയക്കുമെന്ന് അധികൃതർ മുന്നറിയിപ്പും നൽകിയിരുന്നു.

ഇതിനിടെ സാമൂഹ്യപ്രവർത്തകൻ ശിഹാബ് കൊട്ടുകാടിന്റെ ഇടപെടലിൽ ഇന്ത്യൻ എംബസി പാസ്പോർട്ട് അനുവദിച്ചതിനാൽ, രണ്ടു ദിവസത്തെ അനിശ്ചിതത്വത്തിന് ശേഷം ഫഹീം അൻസാരിക്ക് പുറത്തിറങ്ങാനായി. റിയാദിൽ ബിസിനസുകാരനായ ഫഹീം അഖ്തർ സ്വകാര്യ ഗ്രൂപ്പിലാണ് അസർബൈജാനിലേക്ക് പോയത്. പിന്നീട്, അസർബൈജാനിലെ ബാകു വിമാനത്താവളത്തിൽ നിന്നായിരുന്നു റിയാദിലേക്കുള്ള മടക്കയാത്ര.

നല്ല തണുപ്പായതിനാൽ ഫഹീം ധരിച്ചിരുന്നു ജാക്കറ്റിലാണ് പാസ്പോർട്ട് സൂക്ഷിച്ചിരുന്നത്. ബകുവിൽ എമിഗ്രേഷന് ശേഷം വിമാനത്തിൽ കയറിയപ്പോൾ പാസ്പോർട്ട് ജാക്കറ്റിലുണ്ടായിരുന്നു. എന്നാൽ റിയാദിലെത്തിയപ്പോൾ പാസ്പോർട്ട് കാണാനില്ല. റിയാദ് വിമാനത്താവളത്തിൽ നിന്ന് പുറത്തിറങ്ങാനാകാതെ ഇദ്ദേഹം കുടുങ്ങി. റിയാദ് എയർപോർട്ട് മാനേജറാണ്  ഒരു ദിവസത്തിന് ശേഷം മലയാളി സാമൂഹിക പ്രവർത്തകൻ ശിഹാബ് കൊട്ടുകാടിനെ വിളിച്ച് ഇക്കാര്യം അറിയിച്ചത്.

പിന്നീട് ശിഹാബ് കൊട്ടുകാട് വിമാനത്താവളത്തിലെത്തി ഫഹീമിനെ കണ്ടു. ഒരു ദിവസത്തിനുള്ളിൽ പാസ്പോർട്ട് എത്തിച്ചില്ലെങ്കിൽ ഫഹീമിനെ അസർബൈജാനിലേക്ക് തിരിച്ചയക്കുമെന്ന് എയർപോർട്ട് മാനേജർ ശിഹാബിനെ അറിയിച്ചു. തുടർന്ന് ശിഹാബ് ഇന്ത്യൻ എംബസിയിലെത്തുകയും ഒരു ദിവസം കൊണ്ട് പാസ്പോർട്ട് ഇഷ്യു ചെയ്യുകയും ചെയ്തു. തുടർന്ന്, എയർപോർട്ടിലെ ഇമിഗ്രേഷൻ വിഭാഗം പാസ്പോർട്ട് വിവരങ്ങൾ അപ്ഡേറ്റ് ചെയ്‌തു. രേഖകൾ ശരിയായതോടെ ഫഹീം അൻസാരിക്ക് എയർപോർട്ടിൽ നിന്ന് പുറത്തിറങ്ങാനായി.

A young man was reportedly stuck at Riyadh airport for two days after misplacing his passport, highlighting the importance of keeping essential travel documents safe.