ലഖ്നൗ: ബിഎസ്പി ദേശീയ കോഓർഡിനേറ്റർ പദവിയിൽ നിന്ന് നീക്കിയതിനു പിന്നാലെ മരുമകൻ ആകാശ് ആനന്ദിനെ പാർട്ടിയിൽ നിന്ന് പുറത്താക്കി മായാവതി. പദവിയിൽ നിന്ന് നീക്കിയതിനു ശേഷം ആകാശ് നടത്തിയ പരാമർശങ്ങളാണ് ഇതിന് കാരണമെന്നാണ് മായാവതി വ്യക്തമാക്കിയത്. നേരത്തെ പാർട്ടിയിൽ നിന്ന് പുറത്താക്കിയ ഭാര്യാ പിതാവ് അശോക് സിദ്ധാർഥിന്റെ സ്വാധീനത്തിലാണ് ആകാശ് എന്ന് ചൂണ്ടിക്കാട്ടിയാണ് നടപടി.

'പശ്ചാതപിക്കേണ്ട സമയത്ത് ധാർഷ്ട്യം; അതിനാൽ പുറത്താക്കൽ'

"അശോക് സിദ്ധാർഥിന്റെ സ്ഥിരമായ സ്വാധീനമാണ് ആകാശിനെ പാർട്ടി പദവിയിൽ നിന്ന് നീക്കാൻ കാരണം. അദ്ദേഹം പക്വത കാണിക്കേണ്ട സമയത്ത് അഹങ്കാരവും ധിക്കാരവും നിറഞ്ഞ പ്രതികരണങ്ങളാണ് നടത്തിയത്. ഇതിന്റെ അടിസ്ഥാനത്തിലാണ് ആകാശിനേയും അദ്ദേഹത്തിന്റെ ഭാര്യാ പിതാവിനേയും ബിഎസ്പിയിൽ നിന്ന് പുറത്താക്കാൻ പാർട്ടി തീരുമാനിച്ചത്" - മായാവതി സോഷ്യൽ മീഡിയയിൽ കുറിച്ചു.

കഴിഞ്ഞ ദിവസമാണ് ബിഎസ്പി ദേശീയ കോഓർഡിനേറ്റർ സ്ഥാനത്തുനിന്ന് ആകാശ് ആനന്ദിനെ നീക്കിയത്. ആകാശിന്റെ പിതാവ് ആനന്ദ് കുമാറും മുതിർന്ന നേതാവും രാജ്യസഭാ എംപിയുമായ രാംജി ഗൗതവും പുതിയ ദേശീയ കോഓർഡിനേറ്റർമാരായി നിയമിതരായി.

മുന്‍കൂട്ടിയൊരുക്കമായ നീക്കം

ഫെബ്രുവരി 17-ന് ഡൽഹിയിൽ ചേർന്ന യോഗത്തിലാണ് ഇതുമായി ബന്ധപ്പെട്ട അന്തിമ ധാരണയായതെന്നും ഈ വിവരം മായാവതി നേരത്തെ തന്നെ ആകാശിനെ അറിയിച്ചിരുന്നുവെന്നും റിപ്പോർട്ടുകളുണ്ട്. ഇന്നത്തെ യോഗത്തിലും ആകാശ് പങ്കെടുത്തിരുന്നില്ല.

രണ്ടാമതും നീക്കം

ബിഎസ്പി ദേശീയ കോഓർഡിനേറ്ററായി 2019-ലാണ് ആകാശ് ചുമതലയേൽക്കുന്നത്. 2024 ലെ ലോക്‌സഭാ തിരഞ്ഞെടുപ്പ് സമയത്ത് വിവാദ പ്രസ്താവന നടത്തിയതിന് പിന്നാലെ മെയ് 7-ന് അദ്ദേഹത്തെ ചുമതലയിൽ നിന്ന് നീക്കി. എന്നാൽ, എതാനും ആഴ്ചക്കുള്ളില്ർ തന്നെ ജൂൺ 23-ന് വീണ്ടും പദവിയിൽ തിരിച്ചെത്തിയിരുന്നു.

ഭാര്യാ പിതാവിന്റെ സ്വാധീനം കാരണമായോ?

ഈ മാസം 12-നാണ് അശോക് സിദ്ധാർഥിനെ മായാവതി വീണ്ടും ബിഎസ്പിയിൽ നിന്ന് പുറത്താക്കിയത്. പാർട്ടിക്കുള്ളിൽ വിഭാഗീയ പ്രവർത്തനം നടത്തിയെന്ന് ആരോപിച്ചായിരുന്നു നടപടി. അശോക് സിദ്ധാർഥ് ആകാശിന്റെ ഭാര്യാ പിതാവായതിനാൽ, അവരുടെ ബന്ധം പാർട്ടിയിൽ പ്രശ്നങ്ങൾ സൃഷ്ടിക്കുമെന്ന് മായാവതി ചൂണ്ടിക്കാട്ടിയതിനെ തുടർന്നാണ് ഈ നടപടിയെന്നും റിപ്പോർട്ടുകളുണ്ട്.