മസ്‌കത്ത്:  സാമ്പത്തിക ബുദ്ധിമുട്ടുകള്‍ നേരിടുന്ന വ്യക്തികളെ സഹായിക്കാനായി തുടര്‍ച്ചയായ ഒമ്പതാം തവണയും കാരുണ്യത്തിന്റെ കരസ്പര്‍ശവുമായി അജ്ഞാതനായ ഒമാനി പൗരനെത്തി. പേരോ വിവരങ്ങളോ വെളിപ്പെടുത്തിയിട്ടില്ലാത്ത യുവാവ് ഒമ്പതാം തവണയാണ് ഇരുളടഞ്ഞ തടവറയില്‍ നിന്നും സ്വാതന്ത്രത്തിന്റെ വായു ശ്വസിക്കാന്‍ വെമ്പല്‍ കൊള്ളുന്നവര്‍ക്ക് തണലേകുന്നത്. 

'ഫക് കുര്‍ബ' സംരംഭത്തിന്റെ 12ാം പതിപ്പിന്റെ ഭാഗമായി അദ്ദേഹം 49 പേരുടെ പിഴത്തുകയാണ് അടച്ചുതീര്‍ത്തത്. ഒമാനി ലോയേഴ്‌സ് അസോസിയേഷന്റെ ഡയറക്ടര്‍ ബോര്‍ഡ് ചെയര്‍മാന്‍ ഡോ. ഹമദ് ബിന്‍ ഹംദാന്‍ അല്‍ റുബായ് ഇദ്ദേഹത്തിന്റെ തുടര്‍ച്ചയായ പിന്തുണയ്ക്ക് അഗാധമായ നന്ദി രേഖപ്പെടുത്തി. തുടര്‍ച്ചയായ സഹകരണം ഒമാനി സമൂഹത്തില്‍ ഉള്‍ച്ചേര്‍ന്നിരിക്കുന്ന ആഴത്തിലുള്ള മാനുഷിക മൂല്യങ്ങളെ പ്രതിഫലിപ്പിക്കുന്നുവെന്ന് ഊന്നിപ്പറഞ്ഞു.

'ഫക് കുര്‍ബ' സംരംഭത്തിന്റെ ജനറല്‍ സൂപ്പര്‍വൈസര്‍ ഡോ. മുഹമ്മദ് ബിന്‍ ഇബ്രാഹിം അല്‍ സദ്ജാലി, വ്യക്തികളില്‍ നിന്നും സ്ഥാപനങ്ങളില്‍ നിന്നും കമ്പനികളില്‍ നിന്നുമുള്ള തുടര്‍ച്ചയായ പിന്തുണയെ പ്രശംസിച്ചു. ആവശ്യമുള്ളവര്‍ക്ക് പ്രത്യാശ പുനഃസ്ഥാപിക്കുന്നതില്‍ അവര്‍ നല്‍കിയ സംഭാവനകളെ പ്രശംസിച്ചു. പിഴത്തുക അടക്കാനാകാതെ സാമ്പത്തികമായി ബുദ്ധിമുട്ടുന്നവര്‍ക്കായി ഒമാന്‍ ലോയേഴ്‌സ് അസോസിയേഷന്‍ ഒരുക്കിയ സൗകര്യമാണ് ഫക് കുര്‍ബ.

ഈ സംരംഭത്തിന്റെ കാതലായ കാരുണ്യം, ഐക്യദാര്‍ഢ്യം, സമൂഹ സഹകരണം എന്നിവയുടെ മൂല്യങ്ങള്‍ വര്‍ധിപ്പിക്കുന്നതിന് കൂടുതല്‍ സംഭാവനകള്‍ നല്‍കണമെന്ന് അദ്ദേഹം പൊതുസമൂഹത്തോട് അഭ്യര്‍ത്ഥിച്ചു. 2012ല്‍ ആരംഭിച്ച ഈ സംരഭം വഴി സാമ്പത്തികമായി ബുദ്ധിമുട്ടുന്ന 7,110 ല്‍ അധികം വ്യക്തികളെ ജയിലില്‍ നിന്നും മോചിപ്പിക്കാനായിട്ടുണ്ട്. ഈ സംരംഭത്തിലേക്കുള്ള സംഭാവനകള്‍ ഔദ്യോഗിക വെബ്‌സൈറ്റ് വഴിയോ, നിയുക്ത ബാങ്ക് അക്കൗണ്ട് വഴിയോ, 'തവാനി' ആപ്ലിക്കേഷന്‍ വഴിയോ നല്‍കാവുന്നതാണ്.

For the Ninth Consecutive Year, Unknown Benefactor Shows Mercy and Frees 49 People