പേരാമ്പ്ര: മണ്ഡലത്തിലെ നിലവിലുള്ള കൃഷിഭൂമികള്‍ സംരക്ഷിക്കാനും തരിശായി കിടക്കുന്ന കൃഷിഭൂമികള്‍ കൃഷിയോഗ്യമാക്കാനും സമഗ്ര പദ്ധതികള്‍ക്കു രൂപംനല്‍കുമെന്നു സമഗ്ര കൃഷിവികസന പാടശേഖര സമിതി യോഗത്തില്‍ മന്ത്രി ടി.പി രാമകൃഷ്ണന്‍.
'പേരാമ്പ്ര വികസന മിഷന്‍ 2025'ന്റെ ഭാഗമായി ഒക്ടോബര്‍ എട്ടിനു നടക്കുന്ന സമഗ്ര വികസന സെമിനാറില്‍ മണ്ഡലത്തിലെ 45 പാടശേഖര സമിതികളുടെയും പഠന റിപ്പോര്‍ട്ടുകള്‍ ക്രോഡീകരിച്ചു സമഗ്ര പദ്ധതിയില്‍ അവതരിപ്പിക്കും. കര്‍ഷക കൂട്ടായ്മകള്‍ രൂപീകരിച്ചു മണ്ഡലത്തിലെ ആവളപാണ്ടി, കരുവോട്ചിറ, വെളിയണ്ണൂര്‍ചല്ലി, കണ്ണഞ്ചിറ തുടങ്ങി പ്രധാന കൃഷിയിടങ്ങളില്‍ സാധ്യമായ എല്ലാ സംവിധാനങ്ങളും ഉപയോഗിച്ചു രണ്ടുവര്‍ഷം കൊണ്ടു മെച്ചപ്പെടുത്താന്‍ നടപടികളുണ്ടാകണമെന്ന് പേരാമ്പ്ര പഞ്ചായത്ത് ഹാളില്‍ നടന്ന പാടശേഖര സമിതി ഭാരവാഹികളുടെയും കൃഷി ഉദ്യോഗസ്ഥരുടെയും യോഗത്തില്‍ ധാരണയായിട്ടുണ്ട്. ജില്ലയിലെ പ്രധാന നെല്ലറകള്‍ സ്ഥിതിചെയ്യുന്ന പേരാമ്പ്ര മണ്ഡലത്തിലെ കൃഷിയിടങ്ങളില്‍ വെള്ളക്കെട്ടും അട്ട-പായല്‍ശല്യവും രൂക്ഷമാണ്.
യോഗത്തില്‍ മന്ത്രി ടി.പി രാമകൃഷ്ണന്‍ അധ്യക്ഷനായി. ജില്ലാ പഞ്ചായത്തംഗം സുജൈത മനക്കല്‍, ബ്ലോക്ക് പഞ്ചായത്ത് അംഗം കെ. നാരായണ കുറുപ്പ്, വികസന മിഷന്‍ കണ്‍വീനര്‍ എം. കുഞ്ഞമ്മദ്, പുഷ്പ, സുരേഷ് സംബന്ധിച്ചു.