റിയാദ്: മക്ക-മദീന ഹൈവേയില്‍ ഉണ്ടായ ബസ് അപകടത്തില്‍ ആറ് ഇന്തോനേഷ്യന്‍ ഉംറ തീര്‍ത്ഥാടകര്‍ മരിച്ചതായി ഇന്തോനേഷ്യന്‍ വിദേശകാര്യ മന്ത്രാലയം അറിയിച്ചു. അപകടത്തില്‍ പതിനു പേര്‍ക്ക് ഗുരുതരമായി പരുക്കേല്‍ക്കുകയും ചെയ്തു. ജിദ്ദയില്‍ നിന്ന് ഏകദേശം 150 കിലോമീറ്റര്‍ വടക്കുള്ള വാദി ഖുദൈദിലാണ് അപകടം നടന്നത്. പ്രാഥമിക റിപ്പോര്‍ട്ടുകള്‍ പ്രകാരം ബസ് മറ്റൊരു ബസുമായി കൂട്ടിയിടിച്ചതാണ് തീപിടുത്തത്തിന് കാരണമായത്.

പരുക്കേറ്റവര്‍ ആശുപത്രിയില്‍ ചികിത്സയിലാണെന്നും ഇവരുടെ എല്ലാവരുടെയും കുടുംബങ്ങളെ അപകടത്തെ സംബന്ധിച്ച് അറിയിച്ചിട്ടുണ്ടെന്നും മന്ത്രാലയം അറിയിച്ചു.

ലോകത്തിലെ ഏറ്റവും വലിയ മുസ്‌ലിം ഭൂരിപക്ഷ രാജ്യമാണ് ഇന്തോനേഷ്യ. എല്ലാ വര്‍ഷവും ഏകദേശം 1 ദശലക്ഷം വിശ്വാസികളാണ് ഉംറ തീര്‍ത്ഥാടനത്തിനായി മക്കയിലെത്തുന്നത്.

അപകടവിവരം സ്ഥിരീകരിച്ച ഇന്തോനേഷ്യൻ വിദേശകാര്യ മന്ത്രാലയം, റമദാനിൽ ഉംറ തീർത്ഥാടനം നടത്തുന്ന സംഘത്തിലെ അംഗങ്ങളാണ് അപകടത്തിൽപ്പെട്ടതെന്ന് അറിയിച്ചു. പരുക്കേറ്റവർ നിലവിൽ പ്രാദേശിക ആശുപത്രികളിൽ ചികിത്സയിലാണ്. പ്രാദേശിക അധികാരികളുമായി കാര്യങ്ങള്‍ ഏകോപിപ്പിക്കുന്നതിനും ഇരകളുടെ കുടുംബങ്ങൾക്ക് സഹായം നൽകുന്നതിനുമായി ജിദ്ദയിലെ ഇന്തോനേഷ്യൻ കോൺസുലേറ്റ് ജനറൽ ഒരു സംഘത്തെ സംഭവസ്ഥലത്തേക്ക് അയച്ചിട്ടുണ്ട്.