കണ്ണൂര്‍: ബ്രാന്റഡ് വസ്ത്രങ്ങള്‍ക്ക് ഭീഷണിയായി വ്യാജന്മാര്‍ വിപണിയിലുണ്ട്. പീറ്റര്‍ ഇംഗ്ലണ്ട്, ജോണ്‍ പ്ലെയേര്‍സ്, ആരോമെന്‍, ലൂയിസ് ഫിലിപ്പ് തുടങ്ങി യുവാക്കളുടെ ഹരമായ ബ്രാന്റുകളുടെ വ്യാജന്മാരാണ് ഉപഭോക്താവിനു പോലും സംശയത്തിനിട കൊടുക്കാതെ ശരീരത്തില്‍ കയറുന്നത്. വിപണിയില്‍ ആയിരവും രണ്ടായിരവും വിലയുള്ള വസ്ത്രങ്ങള്‍ വഴിയോര കച്ചവടക്കാരില്‍ നിന്ന് 200- 300 രൂപയില്‍ ലഭ്യമാണ്. ലോകോത്തര ബ്രാന്റുകളായ ലൂയിസ് ഫിലിപ്പ്, അലന്‍സോളി വസ്ത്രങ്ങളും കണ്ണൂരിലെ ചില വസ്ത്ര സ്ഥാപനങ്ങളില്‍ നിന്ന് ചുരുങ്ങിയ വിലയ്ക്ക് ലഭിക്കുന്നുണ്ട്. ഒറിജിനലാണോയെന്ന് ഒറ്റനോട്ടത്തില്‍ തിരിച്ചറിയാനാവില്ല. ഇത്തരത്തിലുള്ള വസ്ത്രങ്ങള്‍ നഗരത്തിലെ ഒരു കടയില്‍ നിന്ന് കഴിഞ്ഞയാഴ്ച പൊലിസ് പിടികൂടിയിരുന്നു. പലതും കര്‍ണാടകയില്‍ നിന്നും തമിഴ്‌നാട്ടില്‍ നിന്നും നിര്‍മിച്ചവയാണ്.