കാസര്‍കോട്: ആഫ്രിക്കയില്‍ രണ്ടു മലയാളികള്‍ അടക്കം 10 കപ്പല്‍ ജീവനക്കാരെ തട്ടിക്കൊണ്ടു പോയി. കാസര്‍കോട് കോട്ടിക്കുളം സ്വദേശി രാജീന്ദ്രന്‍ ഭാര്‍ഗവനും മറ്റൊരു മലയാളിയും വിവിധ സംസ്ഥാനങ്ങളില്‍ നിന്നുള്ള അഞ്ചും പേരും മൂന്നു വിദേശികളും ഉള്‍പ്പെടെ 10 കപ്പല്‍ ജീവനക്കാരെയാണ് ആഫ്രിക്കയിലെ കടല്‍ കൊള്ളക്കാര്‍ തട്ടിക്കൊണ്ടു പോയത്.

ആഫ്രിക്കയിലെ ലോമോ തുറമുഖത്തു നിന്നും കാമറൂണിലേക്ക് തിരിച്ച ചരക്ക് കപ്പലാണ് കടല്‍ക്കൊള്ളക്കാര്‍ തട്ടിയെടുത്ത് ജീവനക്കാരെ ബന്ധികളാക്കിയത്. 18 ജീവനക്കാരില്‍ 10 പേരെ തട്ടിക്കൊണ്ടു പോയശേഷം കൊള്ളക്കാര്‍ കപ്പല്‍ ഒഴിവാക്കി എന്നാണ് വിവരം. മാര്‍ച്ച് 17 രാത്രി 11:30ന് ശേഷം രജീന്ദ്രനെ ബന്ധപ്പെടാന്‍ വീട്ടുകാര്‍ക്ക് കഴിഞ്ഞിട്ടില്ല.

പനാമ രജിസ്‌ട്രേഷനുള്ള വീറ്റൂ റിവര്‍ കമ്പനിയുടെതാണ് തട്ടിക്കൊണ്ടുപോയ കപ്പല്‍. വീറ്റൂ റിവര്‍ കമ്പനി 18ന് രജീന്ദ്രന്റെ ഭാര്യയെ വിളിച്ച് കാര്യം പറഞ്ഞിരുന്നു. ജീവനക്കാര്‍ എല്ലാവരും സുരക്ഷിതാണെന്നാണ് കമ്പനി അറിയിച്ചതെങ്കിലും രജീന്ദ്രനുമായി നേരിട്ട് സംസാരിക്കാന്‍ വീട്ടുകാര്‍ക്ക് കഴിയുന്നില്ല.