കണ്ണൂർ: കണ്ണൂരിൽ കൊലപാതകം നടത്തിയതിനു ശേഷം രക്ഷപ്പെടാനായി ഓട്ടോറിക്ഷയിൽ കയറിയ പ്രതിയെ പൊലിസിന് മുന്നിൽ എത്തിച്ചിരിക്കുകയാണ് കണ്ണൂർ കൂളിച്ചാൽ സ്വദേശിയായ മനോജ്. കഴിഞ്ഞദിവസം ഇതരസംസ്ഥാന തൊഴിലാളിയായ ഇസ്മെയിലിനെ വെട്ടിക്കൊലപ്പെടുത്തിയ ബംഗാൾ സ്വദേശിയായ സുജോയിയെയാണ് മനോജ്‌ പൊലിസിനെ ഏൽപ്പിച്ചത്. തന്റെ ഓട്ടോയിൽ കയറിയ പ്രതിയായ സുജോയിയെ വളരെ തന്ത്രപരമായ നീക്കത്തിലൂടെയാണ് സുജോയ് പൊലിസ് സ്റ്റേഷനിൽ എത്തിച്ചത്. 

രാത്രിയിൽ കണ്ണൂർ റയിൽവെ സ്റ്റേഷനിലേക്ക് വരുന്നതിനിടെയാണ് പ്രതി മനോജിന്റെ ഓട്ടോയിൽ കയറിയത്. പ്രതിയുടെ വസ്ത്രങ്ങളിൽ പുരണ്ട ചോരത്തുള്ളികൾ മനോജിന്റെ ശ്രദ്ധയിൽപെടുകയായിരുന്നു. ഇതിന് പിന്നാലെ ഇയാൾ ഒരു കൊലക്കേസിലെ പ്രതിയാണെന്ന് മനോജിന് സംശയം തോന്നുകയായിരുന്നു. ഈ സമയത്ത് നാട്ടിലെ ഒരു സുഹൃത്തിനെ മനോജ്‌ വിളിച്ചു അന്വേഷിച്ചപ്പോൾ നാട്ടിൽ ഒരു കൊലപാതകം നടന്നുവെന്ന് അറിയാനും സാധിച്ചു.

കൊലപാതകം നടത്തിയ പ്രതിയുടെ ഫോട്ടോ അപ്പോൾ തന്നെ മനോജിന് വാട്സ് ആപ്പിൽ ലഭിക്കുകയും ചെയ്തു. രാത്രി വളപട്ടണം എത്തിയപ്പോഴായിരുന്നു ഈ കൊലപാതകത്തിന്റെ വിവരം തന്റെ നാട്ടിലുള്ളവർ മനോജിനെ അറിയിച്ചിരുന്നത്. ഉടനെത്തന്നെ മനോജ് തന്ത്രപരമായി പ്രതിയെ വളപ്പട്ടണം പൊലിസ് സ്റ്റേഷനിൽ എത്തിക്കുകയായിരുന്നു. പ്രതിയെ പൊലിസ് ഉടനെ തന്നെ അറസ്റ്റ് ചെയ്യുകയും ചെയ്തു. 

മുംബൈയിൽ നേരത്തെ ജോലി ചെയ്ത മനോജിന് ഹിന്ദി നന്നായി അറിയാമായിരുന്നു. അതുകൊണ്ടുതന്നെ പ്രതിക്ക് യാതൊരുവിധ സംശയം തോന്നാത്ത രീതിയിൽ പ്രതിയെ കൃത്യമായി പൊലിസ് സ്റ്റേഷനിൽ എത്തിക്കാൻ മനോജിന് സാധിച്ചു. മനോജിന്റെ ഈ മികച്ച നീക്കത്തിനെ കണ്ണൂർ എസ്പി അഭിനന്ദനങ്ങൾ അറിയിക്കുകയും ചെയ്തു.